《我老婆唔係我女朋友》【那些年／九十年代學界／真人】 第七章全新中篇！: 【第八章】 博士大叔（２）
阿腸滿面笑容，唔知仲以為佢是今晚結婚擺酒的新郎哥，一面向我行過來一面擠眉弄眼，又手指指阿心和我，估到佢想確認站在我旁邊的是不是正印女友了，只好向他緩緩點頭。接著向阿心說：「嚟緊呢個係阿祥，之前同妳提過呢，以前中學年代嘅朋友，今次嘅搞手。」
阿心禮貌地向阿腸問好。
「呵呵，終於見到阿仁個女友嘞，真係名不虛傳咁清秀喎。」阿腸大賣口乖。
為免佢繼續亂噏廿四，都是盡快匯合Leon先。
「咦阿祥，見唔見Leon呢？佢話自己嚟喎。」我搶著截斷他的說話。
「條粉皮一早嚟咗啦。係呢，妳叫咩名呀？」阿腸前一句是向我說的，後一句繼續問阿心。
「我叫阿心呀，多謝你請我哋嚟睇星喎。」滿分女友適時表現出大方得體的應對。
「唏，唔使客氣，大家雖然唔同學校啫，但都叫同學吖，招呼同學係我哋學會嘅宗旨嘛。」阿腸又唔知邊度搬啲鬼道理出來。
「喂，不如搵位我哋坐低先啦。」我有點不耐煩。
「嘿，呢條友呢成日都好心急。」他又向阿心說：「嚟，坐呢度先啦，Leon出咗去行一陣喎，佢先前坐呢度嘅，你哋自己招呼自己先，個講座就開始了。」說完逕自去招呼其他人了。