《我老婆唔係我女朋友》【那些年／九十年代學界／真人】 第七章全新中篇！: 【第八章】 博士大叔（３）
第二張我見到的熟悉面孔，真是諗爆頭都想不到，竟然是之前來士多𢯎水吹的那個賭波中年男。我見他仍然是便服一道，但就在外面講臺的位置做準備，莫非佢喺【山大】撈技術支援？
「呢個男人之前去過士多買嘢，成日搵人同佢傾偈㗎。」我握了阿心的手一下，示意她望望中年男。
「我無乜印象喎，不過啲叔叔係鍾意搵返啲叔叔傾偈㗎啦，我呢種美少女唔啱傾嘅。」阿心嫣然笑道。
「飽死呀，妳村姑咋！」被她乘機譏笑我似大叔，忍不住又擳她手心。
可能中年男聽到我們打鬧的聲音，朝我們這邊望過來，他的表情有點驚訝，似乎也認出了我來，向我微笑點點頭，只好走出去跟他寒喧兩句好了。
「啊哈，原來你係【山大】學生呀？」中年男見我行過來搶先開腔。
「唔係啦，我邊有咁叻吖，朋友約我嚟燒嘢食咋，你今晚講星呀？」知道他對觀星有心得，順勢推測他是講者應該沒錯了吧。
「係呀，有少少心得分享吓噉啦，我記得你對星矢有關嘅星座有興趣，等下記得留意囉。」中佬一貫的好吹。
「啊？流星雨都有關咩。」我訝然問道。
「係呀，希望唔好悶到你哋瞓著覺啦。我見你好似同女朋友嚟喎，嗱，一陣聽完講座，正式觀星前嚟搵搵我，我過啲貼士畀你啦。」條友個樣突然間變得有點猥瑣。
「誒…好吖。」唔知點解我又諗起佢講「雅典娜個胸」時候個鹹濕樣。