《我老婆唔係我女朋友》【那些年／九十年代學界／真人】 第七章全新中篇！: 【第八章】 生活情趣（５）
他含糊的不知是不是講了句粗口，陰陰濕濕的說：「佢哋嗰個event叫做『英仙情流黑五夜』聯校燒烤晚會。阿腸提你呀，雖然話就話8月13號係黑色星期五，但實際上睇流星雨係半夜睇㗎，所以集合時間應該係12號星期四晚，小心一陣遲到整整24小時，呵呵。」
「嘩，個名水蛇春咁長又食晒字噉，不過好彩你提一提，我真係以為星期五晚喎。」赫然發現自己又差點柒了。
「阿腸話星期四晚自己去沙田火車站，有校巴坐喎。晚會開始前有專家講解睇星技巧，之後會派發所需觀星工具。晚會先由燒烤開始，等大家邊食邊熱身ice break，到夜啲開始分組睇星，到時啱傾嘅可以睇通宵喎。」Leon簡介當晚流程，做慣搞屎棍是比較注意這方面的資訊。
「哦，噉我哋約邊度等呢？」我下意識的想約他一起去。
「呃，你同老佛爺兩個自己去，我自己入【山大】等得嘞，無謂做電燈膽。仲有阿腸畀咗入場劵我哋，又老免喇喂。」Leon一直無說佢自己當晚的安排，我自己想當然他是黐著我們一起了，不過既然已經跟Lulu通了水，他倆是不是有所發展，就看他們的緣份了，雞仔媒人無謂做得太過露骨。
收線後，突然醒起Lulu個癡線妹都應該跟我一樣以為是星期五晚，畢竟是我畀料佢嘅，都應該要提醒佢一聲。嘗試打去佢屋企無人聽，只好打去call台留言有關星期四晚的安排好了。