《我老婆唔係我女朋友》【那些年／九十年代學界／真人】 第七章全新中篇！: 【第八章】 生活情趣（３）
「你大男人啦，噉以後你負責看舗嘞，我咩都唔做嘆世界喏。」錫完她之後，老虎乸居然軟化變回小花貓，真是始料不及，看來錫錫可以列入伏虎必殺技之一。
「喂呀，噉點呀，我唔鍾意個女友成日俾人睇蝕呀～」我是真心的不想她被其他男生評頭品足。
「嗯～我同阿爸講囉，佢應該可以要求佢哋唔好再寫嘅，噉我都一樣唔想嘅啫。嘻，等你成日話我村姑、鄉下婆吖嗱，知驚喇咩。」她得戚的回應，激得我伸長手去擳她纖腰。
不過我是真的有點心怯，不是對她沒有信心，而是我對自己無信心，好嘢自然多人爭嘛，【建橋】都有社科楊C妮，萬一【神都】嗰面傳開咗南山邨有個「麻甩李K欣」，我就真係煩過梵蒂岡嘞。
「欵呀，唔好擳我先。阿爸話你識自己開舗咁叻仔，好開心話要請你食飲茶喎，你開幾日舗都收咗成4000蚊啊，搞到米叔投訴你偏心點解唔幫佢開舗喎。」阿心眉開眼笑，似乎佢老竇讚我比有人讚她是女神更高興。
「哈，佢又無個囡畀我做女友，係蝕底啲嘞。（她插嘴：亂噏～）啊？嗰日足總盃決賽前就好生意囉。呀，你第日唔准自己去搬汽水啤酒呀，好重㗎，一陣做到隻手粗晒呀。（她插嘴：以後你搬㗎喇～咁多嘢唔准！）仲有快啲教我攞貨啦。」我終於醒起要提她不要再搬啤酒。