《我老婆唔係我女朋友》【那些年／九十年代學界／真人】 第七章全新中篇！: 【第八章】 生活情趣（２）
見她情緒開始平伏，逗逗她說話。「嘻，我以為妳話我飲多咗嘥錢添。」
她橫我一眼，沒好氣的說：「你日日飲十支八支都未怕你啦，我哋攞貨有回扣嘛，攞廿盤送一盤，攞五十送三㗎，有時候啲新牌子做宣傳，唔使錢添。」
「啊？唔怪得可以贊助【神都】啦，有學生話你哋係合作社添呀。」我露出原來如此的表情。
「阿爸點樣招呼佢哋我唔清楚呀，不過平日我哋啲水mark高15%，比起便利店都仲係平嘅，所以就算做13%畀佢哋都會覺得抵囉，何況仲可以用十支送一支呢啲招數呢。你諗吓有咁大數量回扣，送咗都仲夠嗰個小肥日日飲啦。」太子女娓娓道來，原來佢哋士多普遍都通稱飲料為「水」。她頓一頓再斜睥著我：「不過呢，小肥以後都係無得再飲嚕。」
提起【神都】，我醒起《神經》那篇報導，由袋中找回那份報導給阿心看。「點解俾人影咗相都唔知㗎，仲話咩合作社女神呀。」
今次輪到女友瞪著大眼睛兼變黑人問號。「我都唔知喎，哎呀點解㗎。」
我乘機彎身錫她：「妳呀，係我私家女神嘛，唔准噉樣拋頭露面㗎。」
「咿唔…喂呀…舗頭嚟㗎～唔…好噉啦。」她紅著臉嬌聲抗議。
我乘機加鹽加醋：「以後唔准著到小雲噉畀其他人見呀。妳呀，住家菜樣留返我睇㗎咋。唔准對其他人野蠻，只可以對我呀（講完我好似捉蟲），唔准湊其他人，只可以湊我呀。」