《我老婆唔係我女朋友》【那些年／九十年代學界／真人】 第七章全新中篇！: 【第八章】 生活情趣（１）
生 活 情 趣
現時兩家舗頭的老闆都已經回歸，所以星期一的中午，廢青終於唔使再去巡舗了，取而代之就是臨出發去麗池開工前，到士多打躉黐吓女友喇喂。
「你企係度唔准郁，等我望吓你個肚腩！」一去到士多阿心板著臉，我隱隱覺得佢好像啪著了老虎乸模式。
原以為她會笑臉迎「仁」，何解跟想像中有落差呢。「誒…乜嘢事呀，有…事慢慢講啦。」大惑不解下，只好囁嚅著做反應。
「掅起件衫呀～遮住點睇呀！」她叉腰瞪眼的催促。
無奈下只好照做。
「你睇吓你個肚腩又大返嘞！我今朝睇吓本簿仔，你日日都飲兩三支汽水？！你激死人喇。」她揸著那本我用來記錄申領福利的私伙小數簿——篤數！
「我…無呀…我每日一支咋，其他都係請人飲㗎。」我懾於老虎乸氣勢，只能死狗一樣回話。
她聽到後臉色緩和了點，慢慢坐回「老古董」後面。「請人飲都好啲，但日日飲一支都唔得呀，你要戒汽水呀～」
哎吔，天時暑熱想飲啖冰凍汽水都唔得，真係無陰功…不過自己知自己事，肚腩大返的主因是無再吃「土炮減壽餐」，比賽完了當然可以日日沙牛麵、餐蛋麵、炸雞髀、漢堡包…唏，我梗係唔敢自爆啦，容乜易連食都無啖好食。