《我老婆唔係我女朋友》【那些年／九十年代學界／真人】 第七章全新中篇！: 【第八章】 睇聖鬥士學觀星（２）
我還未來得及回應，他又繼續說：「夏季最易辨認嘅星座莫過如『人馬座』同『天蝎座』嘞。嗰日睇完波，天都黑齊喇，向南方好容易就搵到天蝎條尾。」
在他滔滔不絕期間，我又招呼了兩個細路來買汽水。其中一個細路聽到中年男的說話，問他的同伴：「『人馬座』算唔算聖域十二宮㗎？」
欵？我之前又醒唔起天文星座原本就是《聖鬥士星矢》嘅創作藍本喎，細路噉樣一問，登時令宅男底的我對天文大感興趣。
就在細路同伴𢯎頭期間，中年男斜睥了細路一眼，好整以暇的代答：「『人馬座』即係『射手座』，射手係從拉丁語Sagittarius意譯而嚟嘅，所以黃金十二宮嘅射手宮其實等於人馬宮。」中年男隨手在老古董蓋面點水畫了個箭頭（♐︎）。「呢個就係『人馬座』嘅天文符號嘞。呢，記唔記得套卡通一開波雅典娜俾枝金箭射中個『胸』～呢？」
我們兩小一大的細路一齊點頭，同時露出原來如此的表情，對於佢特別強調「雅典娜個胸」反而無乜反應。
「嘩～犀利喎，連星矢卡通都識嘅？」我不禁讚嘆這個中佬「見多識廣」，上至賭波行山，下至星座動畫，全部都吹得兩嘴咁堅揪！果然高手在民間。