《我老婆唔係我女朋友》【那些年／九十年代學界／真人】 第七章全新中篇！: 【第八章】 睇聖鬥士學觀星（１）
睇聖鬥士學觀星
星期一返到士多開舗，剛開了支可樂呷了一口，想不到中年男是第一個來幫襯。
「哥仔，畀兩支生力啦喂，哈。」中佬意氣風發的叫道。
「哦，好呀。咁高興嘅？」條友個額頭都鑿住有好事發生了，我不妨賣吓口乖。
「唏～無睇星期六場波咩？好精彩呀，東方贏4比1，我又買中咗，贏錢呢。」
「嘩，咁開心。」我一邊收錢、一邊袋起兩支啤酒。「咦，噉星期六有無入場睇呀？」都是扯遠少少唔好畀機會佢講場波。
「呵，無呀，上咗山邊『貴賓廳』飲住啤酒剝花生，天黑之後順便睇埋星添呀。」中佬仍是眉飛色舞的模樣。貴賓廳自然是指街坊自設的山邊廂座了。
「啊，石硤尾山邊都睇到星咩？」聽他說起睇星，反倒引起我的興趣。我是由衷的覺得奇怪，不是一直說香港的霓虹冠絕東南亞，光害影響嚴重，導致星光黯淡嗎？
「你有所不知喇，石硤尾近九龍城機場，喺正飛機航道之下，所以樓房一律起得比較矮，上咗山之後大部份市區燈光都影響唔到，睇星一流㗎，你都有興趣咩？」我稍為露出對觀星有興趣後，中佬已經侃侃「有如滔滔江水連綿不絕」，彷如發現新大陸一樣。
石硤尾日日都有飛機低飛經過，噪音問題與九龍城不遑多讓，我等街坊都是從小久經訓練。