《我老婆唔係我女朋友》【那些年／九十年代學界／真人】 第七章全新中篇！: 【第八章】 睇聖鬥士學觀星（３）
「唏，邊係吖，星座係識少少，卡通就屋企個仔都睇啫。」中年男表面謙遜實質有點得戚。
「噉黃道十二宮係咪真係喺天上面搵到晒嘅呢？」有咗星矢嘅加持，星座嘅話題已經完美地引起我的興趣了。
「呵，開始有啲興趣囉喎。嗱，地球自轉公轉你知啦？（我和兩個細路都忙不迭點頭）所以睇星座都分四季嘅，往往都要分開唔同季節先可以制霸十二宮，當然每季都有啲比較容易辨認嘅星座啦。因為佢哋由較多亮星同恆星組合而成，由呢啲星座開始就好易入手嘞。例如春季睇雙子、巨蟹，夏季睇人馬、天蝎，秋季睇飛馬、仙后，冬季就睇獵戶、金牛。」中年男如數家珍。
他吞啖口水後續說：「呀，頭先講秋季睇『飛馬座』呢，查實別名『天馬座』，就係星矢嘅守護星座嘞，所以佢啲嘢全部都係天馬乜乜乜嘅，天馬座聖衣啦，天馬流星拳啦。」中年男偶爾夾雜一些「課外知識」，令教學更加吸引。我們三個再次露出原來如此的表情。
嗱，如果家中小朋友鍾意ACG文化、睇二次元動漫，千萬要支持呀，其實真係學到嘢之餘，增廣見聞、有益身心㗎。（以上說話是講畀我老婆聽嘅，最近宅在家睇新番《彼女、お借りします》、《月曜日のたわわ》、《がんばれ同期ちゃん》，經常被人嘲諷變態佬、金魚佬、無前途…）