《我老婆唔係我女朋友》【那些年／九十年代學界／真人】 第七章全新中篇！: 【第八章】 睇星？！自殺咋啩～（４）
星期日難得一天無需通勤，響應耶教徒呼籲，留在家中大安息日。午飯後打了一陣機，剛有點眼瞓準備上床眠一下，Leon打來找我；自從知道Lulu沒有責怪之意，那天Leon的教訓也不太在意了，不過要好好控制脾氣倒是應該的。
Leon似乎相當無聊：「喂搞咩呀。」
「呵欠～」我竟然可以一聽到他的電話就打呵欠，幸好老友又不介意，其實我份人都幾衰格的。「準備瞌一陣呀，日日都開工，命都唔長呀。」
「呵，噉有機會俾你攤唞下嘞。」Leon一副有好嘢益我的語氣。
「咦咁正？遊船河定水上樂園呀？我齋玩咋，唔好又叫我做救生呀。」天時暑熱日日去水上樂園我都唔拘。
「門小你有無悶啲呀，又玩水？」Leon大潑冷水。
「喂我不嬲都係水系啦，唔好叫我轉山系呀。」
「欵～爭少少，係山系加銀河系，阿腸打嚟話8月13黑色星期五睇流星雨呀，叫你攜眷出席喎。」Leon說出了在比賽那天，阿祥在天文學會搞的活動。
「吓，睇星？！認真㗎？我唔想喎，成晚咁熱我會溶㗎喎。」一個怕熱又惹蚊的肥人，在夏天晚上於近郊睇星，無異於自行了斷。
「唏～你咪咁㒼塞啦，都話睇英仙座流星雨喏，一世人點都值得睇一次㗎，你問咗老佛爺先啦。」Leon知道只有某人有能力駛得郁我。
「哎呀…佢下星期返香港先問到，你係唔係都去？」要去這種「自殺勝地」，我自然想拉埋老友殉葬。
「我睇吓點先，阿腸話要二人同行，如果唔係佢哋幫手配對。一陣…哎吔，你都知嗰啲囡讀得書、呢～年年考第一、入得大學嘅，嗰份『氣質』…哎，仆街我都唔敢諗落去呀。」Leon說出重點來。