《我老婆唔係我女朋友》【那些年／九十年代學界／真人】 第七章全新中篇！: 【第八章】 石硤尾的聖域（２）
點解我講「據聞」呢？理由好簡單，因為我又唔鍾意登高的（但我鍾意去【高登】喎），更加唔會去山邊睇波（因為對踢波無興趣囉），那些高地只在小時候跟老爸上過一次半次而已，就算以前隔個禮拜陪外婆去健康院覆診，對近在咫尺那條「百步梯」都不屑一顧；點解唔行上去？癡隱線啦你，又熱又多蚊，肥人最憎，唔好預我呀。
我見講咗咁耐，都無提到要買定啤酒花生的原因，為免中年男太無癮，只好𢯎啲嘢吹吓。「係呢，聽日總決賽啫，又關買啤酒花生乜嘢事呢？」
「啊呀，你噉都唔知呀？…（下刪100字）…」中年男見終於有嘢我是有興趣的，彷彿找到人生意義一樣。又展開新一浪的演說。
話說去旺角大球場睇波，原來是不設劃位的，所以就算買了門票，都要一早入場霸位，在這大熱天時等開波，剝住萬里望、呷啖冰凍啤酒、再同三五知己吹住水，自然就是最佳的「前戲」了，當然這份套餐對於「山邊雅座」嘅觀眾一樣適用了；萬一場波緊張絕倫，自己又獨具慧眼買中波膽，咁就perfect池了，完美人生至此，夫復何求…（下刪中佬自家看法100字）；不過點都好，終極贏家都是「森記」，因為不論連贏位或是三重彩的啤酒和花生，都是今天銷量冠軍。
中年男發表完一輪「男人的浪漫」後，見我終於「學有所成」，有所得著，非常滿意的畀錢走人了。
眼見都快5點了，趕快去拉低鐵閘先，避免有人再嚟幫襯阻住收工，跟手去後欄搬啲貨出嚟執好，準備埋貓飯就差不多了；坐下來數數錢兜，呵？原來今日兩個鐘差不多做了成千銀生意啊，都算幾好啦，又可以喺女友面前認下叻，哈。