《我老婆唔係我女朋友》【那些年／九十年代學界／真人】 第七章全新中篇！: 【第八章】 石硤尾的聖域（３）
晚上返到麗池，咦？「火雲邪神」芳蹤再現！喂～唔係又喺度兇啲細路嘛？
「Lulu，咦？妳條褲…」我眼前一亮，Lulu今晚著了嗰條BRAPPERS貼身牛仔褲，換了件較為貼身的短Tee，雖然仍是腳踏跑鞋，但已經予人一種煥然一新的感覺，連在泳池門口的教練們也不其然行多了注目禮。
「嘻，你都留意到呀。哈，我都話呢條褲靚啦，又唔准人買喎，好彩嗰日Leon肯同我返轉頭買咋。」她興高采烈的說著，不知道是因為我的留意，還是Leon願意陪她再去買了。
條褲襯得佢咁搶（巴隱閉，SSss～身形喎），盲嘅都知啦，不過我想起當天試身的情況，實在有點歉意。「喂，嗰日發脾四，真係唔好意思啊，可能真係太攰哩。」
「吓，發脾氣？幾時呀，我都唔覺有，你話嗰個廣告姐姐？癡線咩，我又唔識佢，你幫我攔住佢嘛，無事喎。」Lulu瞪眼一輪嘴的回應，不知道傻大姐是真的少條筋還是胸襟廣闊了（不過肯定唔是胸脯廣闊），頓了頓再大力拍我膊頭續說。「唏～姊妹一場，我有嘢梗係你幫我頂住先啦，你唔好介意就真啦。」她一貫豪邁的說辭，除了再讓我覺得啼笑皆非外，還有想哭的感覺，大姐妳點解咁堅持我係姊妹呢…