《我老婆唔係我女朋友》【那些年／九十年代學界／真人】 第七章全新中篇！: 【第八章】 石硤尾的聖域（１）
石硤尾的聖域
中年男見我對波檻又無乜反應，遂順著我口風。「唔係喎，無錢都可以去捧場吖，睇下和仔、偉仔都好呀，去大坑東山頭望落去咪唔使買飛入場囉，當旅行野餐都得，如果買唔到飛，我都上山睇呀。」
「吓，哦，我…聽日要返第二份工呢。」我又唔睇波，和仔、偉仔係高矮肥瘦我都未知啦。啱先過年嗰套賀歲片《射鵰英雄傳之東成西就》，西毒梁朝偉我就識～
石硤尾社區近白田、大坑東和大坑西本來就依山而建，附近佈滿大小山丘，「登高」（唔是【高登】…）一向是這區街坊的嗜好，今天或者都叫「行山」吧。
當年街坊的登高是頗具功能性的，絕非今天的悠閒娛樂，譬如細路放學玩初代War Game，少男少女偷跳，阿毛曬晾衣物、臘味，阿叔打麻雀、睇波，陀地講經、開片等等；呀！還有「雙十節」的「青天白日滿地紅」插旗運動，旗海飛揚，異常壯觀的。
其中一個高地，是今天名揚四海的「窩仔山」，它可經由四通八達的秘道上去，而位於南邊通往大坑東變電站（大坑東遊樂場）的路線，其中有某個方位（一樣搭有私家廂座的），是可以遙望到警察會大球場和部份旺角大球場的，正正就是街坊睇免費波的「架步」，據聞配合收音機，直播電台講波佬旁述，猶如現場睇一樣喎。