《我老婆唔係我女朋友》【那些年／九十年代學界／真人】 第七章全新中篇！: 【第八章】 足球狂熱（４）
踢波我又係唔舐嘅，自己本身是肥底，由細到大最憎熱屎辣辣喺度喪跑，成身汗又臭又黐𥹉𥹉，所以先至中伏話去游免費水啫，不過我要再次重申，去練水的初衷並不是想入泳隊…因此有關足球範疇嘅嘢，我是一問三不知，當然亦無興趣知。
中年男見我無甚反應，稍為轉一轉話題：「喂唔係喎，『東方皇朝』呢期首循環『三零部隊』喎，無乘機落檻咩？高龍開盤東方讓兩球喎。」
「吓…哦，都無錢買，如果有錢就唔使開工，走咗去旅行啦。」我隨口敷衍。那時候的大專生，多會趁暑假到歐洲「流浪」，做窮遊背包客。
高龍是南山邨本環，我唔識佢亦未見過真人，係麗閣班陀地八畀我知嘅，只因女友一家喺度出入，特別關注吓記得而已。當時買外圍波已經相當方便，盤口、落檻都是打個電話講會員號碼就搞𠶧，全口數無需現金交易。
不過賭我又唔啱喎，又唔係唔賭嘅，只是天生黑仔，中學打麻雀手臭啦，摸極都是偏章卡窿，孖同學買馬又搭沉船，整整吓都索性唔賭了，平日最多都是練水時，賭吓汽水、起雙飛，但以前對住老坑都十賭十輸啦（雖然未必關運滯事），賭真金白銀就真係不了；之前趙婉喺學校個外圍，如果唔係Leon出錢落檻，我自己就算事先知道，都恐怕唔會買，唔係信唔過自己的游水實力，而係怕被自己啲賭運反過來克到輸咗比賽。
真係好隱黑㗎～不可不信邪。
所以我一直都不敢相信自己咁好彩，可以贏到個天下無雙小野蠻嘅芳心。