《我老婆唔係我女朋友》【那些年／九十年代學界／真人】 第七章全新中篇！: 【第八章】 足球狂熱（３）
眼見啤酒和花生都就嚟無貨，趁無人買嘢去後欄抬定啲啤酒放落老古董雪定先。嘩，原來一盤生力都好隱重，要扭住耳仔提阿心，以後唔准佢一個女仔自己抬先得。
突然外面一把中年男人的聲音傳來：「喂～～買嘢呀～」
「哦～嚟緊～想買咩嘢呀？」我在後欄老遠叫出去。
「大力兩支，大萬里望一包。」中年男答道。
我打個突，連贏位都中喎，搞咩呀。
「阿哥呀，今日多人買啤酒，呢啲未凍喎，得唔得呀？」根本未來得及雪啤酒，只好硬著頭皮說了。
「是但啦，你聽日又唔開，照買啦。」中年男聞言後有點忟憎。
「無法啦，我都係兼職咋。話時話，點解今日咁多人買啤酒花生呢？」我姑且探聽一下行情。
「原本諗住聽日先嚟買嘅，不過你聽日唔開嘛，唯有買定先囉，噉你哋真係平啲。」中年男見有人搭訕，心情好像稍為緩和了點。
「啊？噉點解聽日咁重要呢？」我一頭霧水。
「喂，你真唔知定假唔知呀？聽日足總盃總決賽喎，東方對愉園，旺角場兩點開波呀。」中年男帶著一絲鄙視的目光，彷彿我活在平行時空一樣。
「吓！哦～原來係噉咋。」我原來如此，卻又不以為然。
位於界限街花墟後面的旺角大球場又暱稱為旺角場。話說當時香港大球場正值重建，所以全港重要的足球賽事，全都轉移集中到花墟這邊來；雖則旺角場的座位，在去年已經臨時加建到8500個，但遇有精彩戲碼，還是座無虛席兼且一票難求。
