《我老婆唔係我女朋友》【那些年／九十年代學界／真人】 第七章全新中篇！: 【第八章】 心之密碼2.0（２）
「呵，成家去旅行咁好呀，我今個星期先喺宿舍返嚟咋，都唔知佢哋交低畀你添。」Ruby一貫笑嘻嘻的表情說道。
「哦…欵？妳讀邊間㗎？」
Ruby輕鬆的回答：「我喺【灣大】讀PHAR㗎。」原來佢就係之前阿心提過喺【灣大】住Hall嗰個同學。
「嘩～堅喎，【灣大】藥劑咁難都入到。」自己考得差，所以我是由衷覺得讀書叻嘅人真係勁，還記得上次舞會時佢「Ru田一」上身，顯然佢應該是心思縝密的聰明人。
「唏，A-Level符碌撞中啫，邊關事吖。」Ruby仍是輕鬆的答道。
嗱，呢啲咪門面說話囉，又唔見我符碌，人人都讀到仆街㗎啦，出到嚟咪又話無溫書成晚打機唱K，好彩撞中兼天才波，你信而你又真係跟佢唔讀，就真係一世唱K了。去比賽都一樣，個個練到口水鼻涕倒灌，跛手跛腳，攞獎時咪又故作輕鬆，問我就最清楚了。
「妳謙啫，又唔見我考到。想買乜嘢呀？」我自覺語氣都透著真心。
「無呀，之前一直住Hall，而家放暑假，想過嚟打個招呼咋，以前暑假都係阿心看舗嘛。」Ruby攤攤手說道。
「哦…天氣咁熱，不如飲支汽水吖，我請啦。」這句說話近期幾乎成了我的口頭蟬。
Ruby飲汽水同時，我自己又唔執輸順便飲埋，反正都是慷阿心之慨，大家有一句沒一句的亂吹水，講起開舗兩小時的原委，原來以前佢哋班女仔放假會喺士多一邊看舗一邊打牌的；Ruby特別提醒收回租出的麻雀，一定要數清數楚，事關缺一隻就成副麻雀廢了，好彩佢提一提，我完全無這個警覺性。