《我老婆唔係我女朋友》【那些年／九十年代學界／真人】 第七章全新中篇！: 【第八章】 心之密碼2.0（１）
心之密碼2.0
檢查「蛋格」？阿心妳搞咩呀…由於醫館的雪櫃是專門放置藥品，所以「蛋格」位置當然不會有雞蛋，甚至應該是沒有任何嘢的；打開雪櫃看看「蛋格」位置，赫然放有一塊四開對摺的小紙卡！因為摺得相當精緻，而且平日根本無需留意「蛋格」，所以一直沒有察覺。趕快打開來看，一看之下幾乎大叫救命，又嚟？！
下款是她那組專用的簽名碼，不會錯了，數數日子她已經去了旅行兩星期，想是怕我無聊掛念，算定時間又派新的作業給我，佢又唔知我日日做到隻狗噉。哎呀～～正正經經寫句「我愛你」唔得嘅…成日玩解謎遊戲，今次又H2O又CO2啲化學嘢。
順手將小紙卡袋起，先快手完成各項檢查，跟手仲要返士多開舗。
返到士多，才剛開了所有小電器，還未有時間坐低飲汽水，已經有人上門幫襯了。
「咦？你…你咪…阿仁？點解你嚟看舗嘅，心爸呢？阿心呢？」原來是阿心的舊同學兼石硤尾街坊Ruby。舊年去跨年舞會時見過她的，她揪住一袋二袋噉，似乎是剛剛買完餸經過。
「啊呀，妳係…Ruby，佢哋成家去咗旅行呀，我得閒咪幫佢哋看一陣舗囉，想買乜嘢吖？」唔通忙到仆街我又話妳知咩，「得閒」呢啲門面說話點都係要講嘅，一陣畀小野蠻啲姊妹唱通街，話佢虐待男朋友，咪又搵自己笨實囉。
所謂好仔兩頭瞞，真係有苦自己知呀。