《我老婆唔係我女朋友》【那些年／九十年代學界／真人】 第七章全新中篇！: 【第八章】 心之密碼2.0（３）
吹吹下又講到佢讀藥劑嗰科，唔講唔知原來涵蓋範圍都好廣泛，基本盤包括藥物本身，但原來還要修常見草本藥物、醫學化學和業界法規；聽佢提到草本藥物，我又可以搭嘴交流下醫館啲山草藥噉啦。
突然醒起，係喎，喺醫館執咗阿心第二份功課，霎眼瞄過今期有化學嘢，眼前咪有個化學強人囉，即時請槍可免花太多時間呢。一念及此，即時缩到老古董後面，掏出嗰張密碼紙，將頭兩行有關化學元素的文字抄下。
「欵，Ruby，有個小謎語想請教下。」我將抄出來的內容遞給她看。
Ｈ２Ｏ＝１ｘ２＋８
ＣＯ２＝６＋８ｘ２
「呵，好容易啫，hydrogen（H）咪1囉，oxygen（O）就8囉，不過條公式就假嘅，無人會咁樣寫化學式嘅，睇埋carbon（C）係6啦，dioxide（O2）條算式又係亂作啦，似乎個謎底係想用化學元素，對換成數字，堆砌嚟做答案喎。」Ruby只掃視了一眼就能說出關鍵。
「哦，噉如果再有其他元素要對，應該點呀，我唔會好似妳咁醒背晒喎。」
「唏，搵張『元素週期表』對咪得囉，使乜背啫。」Ruby笑著指正我這愚蠢的問題。
Ruby回家後，那天一直等到5點閂舗，【神都】學生都沒有出現還麻雀，反而有幾個細路行過買汽水零食，不過唔無所謂了，反正她的學生證仍在扣押中。
晚上回家，翻轉房間都找不到元素週期表，其實這些史前物品，真是不可能會再在我生命裡面出現，但問題是怎樣解決剩下的謎題呢？頭兩行明顯是引子，指導我如何解題，下兩行才是戲肉，但又不能夠直接給Ruby看，萬一她邊看邊傳譯，到時實老尷死。