《我老婆唔係我女朋友》【那些年／九十年代學界／真人】 第七章全新中篇！: 【第八章】 街坊女神傳說（３）
收了她的學生證和60大洋，順便瞄了一眼核對一下個樣，她叫黃惠筠；再去後欄找一找，又真係有個鐵箱裝嘅廣東牌、手提篋裝嘅台灣牌和一塊麻雀枱板！於是取了出去讓她檢查。
（編劇按：不妨又想像一下條囡係邊個？）
她點好麻雀夠數準備走了，臨走前問我：「師傅你星期三開幾點呢？」
「嗯…我開3點至5點囉，你哋可以話畀其他同學知，盡量呢個時間過嚟買嘢啦。」我想反正都開舗了，不如講實幾點，讓彼此有預算，唔好阻住我跑下場。
突然那男生又搭訕：「係呢，阿師傅你知唔知老闆個囡會唔會嚟看舗？」
我怔了怔，莫非你條沐契想打我條囡心穎還是阿妹心瑜主意？抵畀貓蝨汽水你飲嘅。
「誒…應該唔會啦，如果唔係老闆都唔使請我啦，你有事搵佢咩？」我當然扮傻扮到底。
「無，合作社女神係我哋男生嘅精神寄託啫，你識唔識佢呢？老闆唔准我哋同佢個囡傾閒偈㗎，所以大家都覺得佢有種冷冰冰嘅感覺囉。」男生想反過來問我情報。
合作社女神？！
「誒…我未見過佢呀，索唔索㗎？」我突然又好想聽吓呢班粉皮點樣形容佢兩姊妹。
「嘩，近水樓台你都唔識佢？有無咁嘥料呀，老闆個囡好玉女feel㗎，OK索添㗎。睇年紀我哋估佢讀完中學啦，唔知做嘢定繼續讀書咋。」那男生說時一臉仰慕之情。
那些年是非常流行用「玉女」這個名詞的。
「嘖！行得未呀？」那女生在旁不耐煩的催促，貌似手痕得不得了。
「你睇？我肯定女神唔會係呢啲港女啦，師傅你記得搵機會呀，入咗廟點可能唔拜觀音呀。」邊說邊在打罵聲中托著麻雀板離開了。
嗯，聽佢嘅形容，印證返《神經》內文幅相，合作社女神應該係指阿心而唔係心瑜。嘿，你班粉皮唔知啫，我個雅典娜對我都不知幾熱情啦，唔通幾年前觀音不知不覺被我溝咗又話你知咩～