《我老婆唔係我女朋友》【那些年／九十年代學界／真人】 第七章全新中篇！: 【第八章】 街坊女神傳說（１）
街坊女神傳說
好死唔死俾條囡瞥到我放在舗外的那包「裹屍報」，原本剛才走人時想順便拿去丟掉的，所以開閘時暫時先放在舗外地上。
「喂你睇？」她著那男的看看。
那男生不以為然：「老闆識用一定係噉用啦，份學生報包垃圾正路吖。」
咦？又合作社又學生報，呢兩條友似乎係【神都】學生喎，正好可以打聽一下。
「阿哥仔，我聽你話咩嘢合作社，究竟乜嘢一回事呀？我初嚟步到乜都唔知。」我扮無知的收風。
「哦，你新嚟唔知啫，【森記】喺我哋學校好出名㗎，老闆經常都贊助我哋啲學會活動㗎。」個男的侃侃而談。
「係呀，老細成日都話我哋係學生，主動收平我哋㗎，噉大家都話【森記】係我哋學校嘅合作社囉。」個女的也附和說。
「啊？噉你哋係邊間學校㗎，唔係已經放暑假喇咩？」我繼續扮傻扮到底。
「唏，行前幾步間【神都】之嘛，我哋住宿舍㗎。喂師傅，你平日開唔開舗呀，我哋班宿生都無晒精神寄託呀。」男的愈講愈興奮。
「我逢一三五都返嚟嘅，你想我開幾耐吖？」我好生奇怪，無得飲汽水啫，使唔使講到精神寄託咁嚴重呀。
「喂𠶧呀，今日租兩日後還，攞出嚟啦。」男的一臉期待之色。