《我老婆唔係我女朋友》【那些年／九十年代學界／真人】 第七章全新中篇！: 【第八章】 臨時老闆（４）
「吓？哦…嚟吖。」你都攞到嚟門口喏，唯有又再推返個閘上去。阿心有吩咐過我，萬一我巡舖時有人想幫襯，都照樣招呼佢哋，唔清楚收幾錢唔緊要，做街坊生意最重要予人方便，照問佢哋收開幾錢就得，啱先Leon又勸導我應該收歛和改善脾氣，也就沉著氣，乘機當做實習好了。
「哥仔，唔該你將啲樽放門口個汽水盤得喇，幾多支呀？」我順口吩咐他們自助。
「兩支呀，我哋而家又想飲支喎。」
「嗱，1蚊先，汽水自己攞吖，不過我新嚟兼職唔知收幾錢喎。」5毫一個回樽我知嘅，其他售價就真的不曉了；阿心本私伙小數簿旁邊有個細錢兜，有一百幾十「神沙」銀頭，預留畀我用來作應急找續的。
「哦，堂飲兩個半一支啫，點解唔見老細嘅？好似幾日無開舗囉喎，我哋諗住行過嚟如果無開，個樽丟咗就算了。」男生說著時放下了5蚊。
自顧自的拉開水缸雪櫃，取出汽水在雪櫃附設的開瓶器開了樽蓋，然後又順手在那捆飲筒取了兩條飲筒，跟那女生一人一支在飲了。
「呃…」我想喝住佢唔好用飲筒都來不及了，只好繼續說：「呀，阿老闆放長假，過多兩個禮拜先返。」
「哎吔，合作社都唔開真係好唔方便呀～」男的在傷春悲秋，那女的卻在眈天望地，而我只想快快閂門，砰砰聲隊完好走啦，仲要趕下場呀大佬。