《我老婆唔係我女朋友》【那些年／九十年代學界／真人】 第七章全新中篇！: 【第八章】 臨時老闆（３）
最後有些軟性專題，今期是「課餘的大專生」（【神都】當年都是大專而非大學），快揭兩頁都是講吓吃喝玩樂和兼職工種等行貨，真係隨口噏都可當秘笈賣稿啦！
正準備撕開用來執屍時，瞄到版尾介紹兼職時，其中一張相好像熟口熟面的？赫然發現照片是由【森記】門外影入舖內，朦朧中仍可辨認出是阿心坐在「老古董」後面睇舗，小標題寫著：店務員工作，內文是綜合各種零售店店務的簡介，唯最後一段寫著：誰說店務工作無前途，隨時讓你脫離單身行列呢——攝於本校特約合作社，附圖為合作社女神。
欵，點解我個雅典娜會變咗大眾女神嘅？嗯…不過個衰妹天生李K欣輪廓又真係無敵嘅，人哋後天想整都整唔到；就是日常的素顏，遠望已經誇啦啦，近睇又唔是小喇叭的，雖則臉頰係有啲花，頭髮又旱又開叉，不過確實係幾靚呃到吓人的。話說我始終無膽量去糾正佢話自己似王C賢單嘢，無謂引出小野蠻，令自己大麻煩。
看看時間都不早了，要快手撿完屍再返麗池開工，我將《神經》最後那份專題報導收起，留待日後興師問罪，其他就用作「裹屍報」清理凶案現場。
一切收拾定當準備「撇s」，人在門外正在拉閘時，後面有把年輕的男聲問我：「師傅，可唔可以回樽呀。」
我轉頭望去，是一對跟我差不多年紀的男女提著兩個可樂樽，剛剛應該是男的開聲。