《我老婆唔係我女朋友》【那些年／九十年代學界／真人】 第七章全新中篇！: 【第七章】 星 探（４）
Leon在BIG JOHN門外解釋：「通常製作公司嘅工作範圍分兩大類嘅，做廣告宣傳同市場推廣活動啦，頭先個潘小姐就係做廣告宣傳嗰邊囉，我就做市場推廣嘅。」
「嚇死我呀，我第一次遇到有人搵我拍廣告咋。」Lulu猶有餘悸，看來她是真的被嚇得手足無措。
「妳唔使咁快覆佢嘅，等我返去幫妳八吓呢間公司信唔信得過先啦，我隨便噏妳叫Louisa，等佢問唔到妳啲料住。」他以業界人士的身份幫忙，讓Lulu也安心一點。
「喂乜你真係好攰咩？你哋陪咗我成日，我請你哋食飯吖。」Lulu轉而望向我說。
「哎…唔喇，妳叫Leon陪妳食啦，我返歸瞓覺嘞。」再食埋飯加上兩條友雞啄唔斷，恐怕聽朝都返唔到屋企。
「都買咗裙喏，不如放佢走啦，我陪妳食飯啦。咦？不如妳睇吓呢間啱唔啱食？」Leon出口解圍。
趁Lulu行開睇那家食店時，他拉我到一邊。「喂，頭先做乜咁好火呀？你好耐無好似以前中學時咁衝動囉喎。嗱，兄弟先提你咋，做廣告呢行，最講究人脈，所以萬事都以和為貴，要做到面面俱圓，雖然唔知高妹會唔會入行，但如果你隨便爆人，傳開咗點都會有影響㗎。」
「誒…我又無諗咁多喎。」我這才發現有點不妥。
「唉～過兩年畢業都出嚟做嘢啦，要開始節制下啲脾氣嘞，明明早嗰輪先話你啲性格唔同晒，重以為你收晒火添。」Leon苦口婆心的勸說。
「可能太忙又太攰啩…」事實上我自己也不太清楚原因。
「係唔係老佛爺唔喺身邊，成日囉囉攣呀？之前阿心喺度，變到成隻綿羊噉，似乎真係佢先治到你。好啦，做兄弟嘅再講都口臭，自己注意啦。我會睇住高妹嘞，如果太夜我會送埋佢，你放心返歸啦。」