《我老婆唔係我女朋友》【那些年／九十年代學界／真人】 第七章全新中篇！: 【第七章】 星 探（１）
星 探
連正在旁觀的客人也竊竊私語。「係啦，頭先條褲好啲，呢條裙成個人老晒。」
Lulu即時搭嘴：「你哋都覺得條褲好啲哩，佢哋迫我要買裙呀。」這個大喇叭真係隨時隨地都可以跟人搭訕。
「欵，唔舒服咪唔要囉，不如試埋最後嗰條啦。」我趕快出聲，一陣佢再同嗰啲「塘邊鶴」雞啄唔斷，我真係成晚唔使收工。
「哈哈，好吖。」Lulu轉頭蹣跚著返回試身室。
旁觀的客人聽到還有第三件試身，乾脆停下來等，彷彿好似睇時裝表演一樣，期間還一臉疑惑的不住打量我和Leon，奇怪兩個廢青會護著個少女試衫，又話要迫她買裙，令我們不知如何自處。
大約五分鐘後，試身室布簾再度拉開，在萬眾期待下，Lulu穿著一條洗水藍的牛仔短裙，小跳步的由試身室出來，裙款大概是流行的高腰「A字裙」吧，長度只是剛好遮掩到她的美臀；在她「九頭身」比例下露出的長腿比正常人更顯長，益發映襯出短裙愈短，令她看起來不但活力充沛，更有一股清爽的魅力。
要知道短裙是非常難駕馭的，布材少導致款式單調，detail位亦少，因此穿上牛仔短裙，根本開宗明義就是要引誘人，將目光放到你的腿部，也就是完全決勝於美腿的質素！嘿，美腿嗎？這個運動形又活力四射的Lulu，根本就無得輸；而且從Lulu的表現看來，她也非常滿意這條短裙呢。