《我老婆唔係我女朋友》【那些年／九十年代學界／真人】 第七章全新中篇！: 【第七章】 水上樂園也屈蛇（１）
水上樂園也屈蛇
以前讀中學時放暑假，我幾乎每星期都有得去水上樂園，有時候甚至一星期去兩次，通常是同學委託（也有是他們的家人想去玩），有時候就自己和泳會朋友去玩，總之除了九龍仔泳池外，這是留得第二多腳毛的地方了。
喂～咪吹水啦，去泳池練水就話「老免」，入場唔使錢啫，你哪有錢每星期都去海馬公園襯呀？
確實水上樂園單次成人收費60，小童／學生30，夏季通行証200大洋，當時報紙賣４大洋一份，薄裝港漫6大洋一期，吃「阿活」晚市頹餐，有飯有餸跟湯也還是20大洋有找，所以不要說買通行証，縱是用學生票入場，窮隱廢青如我每星期去玩，連車費算毫無疑問會破產的。
所以點會係自己出錢呢。
首先如果是「伴游」的委託，行規是老細會包入場費的，而且還有時薪𢭃；如果自己去玩呢，就需要另覓門路了，幸好在香港永遠是「識人好過識字」的（你黐到藍血Zoe直情可以做打工皇帝添啦），以前在泳會有個真名不詳的師兄叫「孖四」，正職行蠱惑（當年沒有深究，反正都是跟某字堆阿哥嗰啲），兼職做救生員的，由於正職、兼職兩份工作，工時和開工率都不穩定，所以加起來反而剛剛好，可以互相幫補，當時也是他教曉我早早去考救生員有著數的。
後來孖四轉到水上樂園當救生員，聞說人工福利也不錯，在缺乏人手下，很快還紮職做「更頭」，當年放榜如果我讀唔到大專，我都可能跟他去海馬公園開工。