《我老婆唔係我女朋友》【那些年／九十年代學界／真人】 第七章全新中篇！: 【第七章】 第二苦主（４）
又係嘅，話晒「陳瀡」以前都係「女人湯丸」（嘿，以前無人叫「男神」咁膚淺嘅），一陣好似老表搭上校花噉，隨時變校園公敵。
「欵，阿心去咗旅行，你都無嘢做啦。不如你陪我去買衫畀啲意見吖，反正我約師兄，你都有份幫口，唔怕你笑我。」Lulu一個轉身射三分波。
我怔了一怔：「喂，你話你第一次約男仔去街，似乎唔應該叫我截糊喎，重有頭先你話聽日去買？我聽日去水上樂園開工喎。」
「唏，你係姊妹嚟啫，你都唔係師兄嗰類型。收工一齊去買得唔得呀？嗱，陪我去，嗰年曬到變賓妹件事，算無數嘞。」她的直腸直肚搞到我啼笑皆非都不是第一次了。她想了想後欲言又止：「欵…水上樂園？我…」。
我接口：「點呀，有乜嘢一次過講埋嘞。」話我無總舵主咁man都受得了，都無咩嘢嚇得到我。
「嘻…我未去過水上樂園嘅，橫𠶧放暑假又無嘢做，可唔可以跟你一齊去呀？」都說她跟馬飛是同鄉，超級爛玩。
但有人居然未去過水上樂園，在我來說是不可思議的，事關除了九仔泳池外，水上樂園就是我第二個主場。
「嗯…妳想去嘅都無不可嘅，但我做嘢唔得閒顧住妳喎。」我當下簡單解釋了阿材的委託任務。
「唔怕啦，我自己玩都得㗎，我靜靜哋跟喺你哋後面咪得囉。」Lulu信誓旦旦的說。
Lulu會靜靜？真係馬騮都會坐定，不過佢自己唔介意都無所謂吧。「隨便妳啦，我朝早要教班，中午喺金鐘集合，妳記得要帶一套T shirt波褲，唔好淨係穿泳衣去水上樂園喎。」