《我老婆唔係我女朋友》【那些年／九十年代學界／真人】 第七章全新中篇！: 【第七章】 水上樂園也屈蛇（２）
由於海馬公園的門票是以人手搣飛入場的（當時未有嘟barcode的電腦系統），造就了我們通過孖四就可以免費入場了，古有掹衫尾入戲院睇戲，今有拍膊頭入水上樂園，所以我每次去玩都會找孖四搭路。
「喂，唔該孖四吖，阿仁call，叫佢覆電話。」孖四傳呼機號碼都是44，今晚收工也就試試找他，畢竟慳得一點得一點都好呀。
約半小時後，孖四覆機：「阿仁？幾年無搵我囉喎，門小你，而家喺邊度發財呀。」幸好他還記得我，他背後的聲音非常嘈吵，但仍聽得出是非常流行的跳舞歌《I Will Survive》，可能在酒吧或K場吧。
「無呀，仲讀緊書咋，你仲有無做海馬公園呀？我想聽日去玩喎。」我仍是未有經濟能力的學生哥，也就開門見山、老實不客氣了。
「吖你個仆街仔，仲讀緊書？孖你賭錢真係死得，輸成世呀。哦～我聽日休息喎。嗯～你聽日搵我條𡃁啦。」孖四仍是一貫江湖中人的口吻。
「吓？！唔使勞煩你啲團契兄弟啩。」我嚇了一跳，屈蛇入場玩咋喎，唔係屈蛇返大陸嘛。
「啊，哈哈哈，唔係呀，水上樂園啲同事嚟，我個組員佢叫Simon，咪咁敏感啦。」當下孖四講了一個電話號碼給我。
嚇得我吖，以為入海馬公園都要「響朵」。「哦，係咪仲係去大樹灣嗰邊入場？」因為喺正門入太揚，所以以前我們會在大樹灣員工出入口那邊進去，順便坐吊車落山。