《我老婆唔係我女朋友》【那些年／九十年代學界／真人】 第七章全新中篇！: 【第七章】 練水都有出頭天（４）
次日午飯後我就去見工了。
「誒…你好，我係鄧浩仁，想搵蔡姑娘呀。」社區中心門口個姐姐仔都幾索，但有啲西面，吩咐我坐一陣就無視我了。
「鄧浩仁，入嚟房傾吖。」看似是肥婆蔡的女人叫我，她其實不算肥（相比起肥直和我），只是較為豐腴，有啲肉哋噉，出乎意料的頗為年青，看起來只有三十多歲，極其量也只算是中女吧。
「你幫咗我哋大半年，都係第一次見面咋喎。」肥婆蔡長著plaza面，仲要戴橢圓形眼鏡，一副管家婆面相，但開場白都頗為客氣。
「哦～係呀，蔡姑娘，我都係第一次嚟中心咋。」由於肥直直接幫我搞晒註冊和登記出糧戶口等雜務，所以我從未在中心出現過。話說以前兼職炒散，手續比較簡便，起碼無「強姦金」呢啲搵笨實嘢，真係畀個名同戶口出糧就𠶧。
看著我帶去的學界比賽和拯溺證書，肥婆蔡的樣子有點迷茫，我賭佢根本唔識我嗰啲係乜嘢證書，果然她開口問我：「鄧浩仁，不如你解釋吓呢啲證書代表乜嘢吖。」
（嗱，大家唔好以為我吹水吹上腦嘞，真人真事有證書有真相，今天回望原來我小時候在水系的履歷是相當不俗的，只是慣性被老媽睇死、被女友（老婆）丑化而已，哈～）
（當然勿要跟阿里仔等天生明星相的高、富、帥比，先天和後天都贏在起跑線才是真正的人生勝利組。想去奧運？要錢、要父幹的～今時今日都是！）
「哦，黃色嗰兩張係學界比賽嘅冠軍證書，其他就係拯溺嘅證書囉。銅章、磁章就係泳池當更嘅資格，銅十字同銀十字就喺沙灘當更嘅資格。」我自己都是第一次這樣介紹，事關以往人家一早都知這些證書的級別。
「嗯～但個班只要求有銅章就可以囉喎，你有4張拯溺證書即係代表乜嘢呢？」肥婆蔡問了一個相當低質的問題。
佢真係唔識㗎喎，即係代表乜嘢？！兩個字——猛料囉你鹵味。
「誒…銅章即是我啡色呢張啦，其實係最基本嘅，噉其他都係比較高階啲囉，有時候有啲會所或者私人泳池會要求個救生員有高啲功力嘅。噉如果要去沙灘做，就要考十字證書囉，就我綠色呢張啦，香港都有私人沙灘請人要有高級啲嘅資格㗎。」雖然我盡力解釋畀佢聽，但我感覺如同向街市賣魚勝解釋一樣，唔識嘅點都係唔識。