《我老婆唔係我女朋友》【那些年／九十年代學界／真人】 第七章全新中篇！: 【第七章】 練水都有出頭天（３）
肥婆蔡即是社區中心的蔡姑娘，負責管理泳會日常營運開銷的，簡單啲講泳會係佢揸數嘅，儼然為泳會坐館。
「唉～阿直，你就咪同肥婆嘈啦，好男不與女鬥嘛，話時話你知我實有拯溺牌㗎？你無咩？」我說好說歹的安撫他一下。
肥佬明顯窒了一下：「呃，我喺大陸時無呢啲嘢喎。挑，萬一你無咪即刻考囉，成個泳池都係教練，你慌無人教咩，有幾難啫。」
哦，你七省飛魚梗係唔難啦，你鹵味，自己無牌就搵我呢個師侄做下靶，但想想都係要幫佢頂㗎啦，一陣佢無面時我都唔會好過；仲有考牌有考期嘛，真係話考就考咩。
「是但啦，阿直你想我教咪教囉，做幾多日㗎？」我隨口問問。
「點隱知，你聽日帶埋啲游水呀、拯溺證明去見肥婆，順便自己問佢啦。」他發晦氣的說道。
晚上回家找資歷證明，好彩那時候有「買」埋拯溺證書；噢，是呀，當年的拯溺課程，只會包（給）你一個鐵章和log book作證明，所以人人說銅章、磁章、銀十字章之類，真真正正是一個鐵勳章來的，要有紙本證書就要另外科水買了，幸好老媽聽我吹，說將來見工都要靠佢，所以願意額外畀錢買埋，否則都唔知帶乜嘢去見肥婆了。之但係游水就只有學界冠軍那兩張證書，其他公開賽、分齡賽之類，就只有獎牌，唔通真係咁戇狗帶袋金牌（如果是真金就發了）去見工？都是算罷啦，隨便帶埋兩張學界證書算了。