《我老婆唔係我女朋友》【那些年／九十年代學界／真人】 第七章全新中篇！: 【第七章】 練水都有出頭天（５）
「嗯～OK啦。」肥婆蔡似乎勉為其難收貨。
我心諗仆街妳考畀我睇吖，又唔見妳做學界冠軍？唉～所以話喺香港贏埋啲廢鐵、考埋啲廢紙都係無銀用。
於是肥婆蔡開始講解佢個習泳班詳情了。「我哋搞習泳班呢，主要都係配合政府推廣游泳運動，個理念係…（下刪二百字）…暫時都係開三班啦，逢二四六早上10點喺深水埗池（麗池），登記簽到文件我哋會叫人送去泳池嘞。其實都係同你平日泳會做開嘅流程差唔多啦，入場同上水都要點名，習泳班我哋一樣有專用泳線，但要派政府提供嘅布泳帽。你仲讀緊書？（我：係呀，讀緊大專），九月開課前泳班會完晒㗎嘞。（我想講我十月先開課呢）係呢，你有無問題呀。」
她停下來飲了啖水，一輪嘴講了差不多10分鐘，但仍未講到我最關心的重點。
「誒…蔡姑娘，我想問人工點計呢？」炒散兼職最緊張人工嘛，唔通講晉陞前途咩，都唔熟性嘅！
「嗯，我睇你啲資歷超晒班喎。嗱，政府要求有銅章，你又有埋啲唔知乜嘢十字章，仲多成三個，你本身又做過救生員，而且又係學界冠軍，又幫我哋會教水，應該可以申領最高薪級點喎。」肥婆蔡低頭查了一會，迎上我殷切的目光，終於講出重點了。「嗯～可以有200蚊一個鐘喎，不如照平日月尾截數，銀行過數出糧啦，無問題下星期二開始第一班喇。」
WOW～我第一次發現原來學界冠軍張Cert，竟然都可以用來賺錢的，真是匪夷所思，返去一定要串返老媽一鑊，乜嘢四肢發達、淨係識游水實餓死，仲禁足唔畀我游比賽吖嗱～我話學生運動員唔係臘鴨！學界冠軍個「朵」都可以用嚟搵食嘅。