《我老婆唔係我女朋友》【那些年／九十年代學界／真人】 第七章全新中篇！: 【第七章】 肥矮毒都有市場（３）
她橫我一眼：「咪就係成日亂嘥錢囉！」
我執起她的手再說：「纖纖玉指有啲嘢襯吓先靚嘛。」
賣花當然要讚花香哩，妳又點知我當隻戒指係金剛箍，宣示妳名花有主呢，雖然肉赤但仍心下暗爽。
「仲好講！買嘢畀人都無心肝嘅，點會買錯碼嘅呢。」她伸出戴著戒指的食指投訴。
戴在食指？有無搞錯呀，一般送戒指給女朋友作為宣示主權，都想對方戴在無名指或中指吧，點會係食指㗎？所謂人生自古誰無「柒」，我柒仁也不例外，買戒指時竟然用了自己的肥手指做標準，完全忽略了瘦妹手指的修長；只是她頑固，怎樣也不肯去換，說是我親手揀給她的禮物，最後她唯有將戒指戴在食指，還戲說方便彈琴呢。
「哎吔，都話我無經驗送嘢畀女仔嘛，我鬼知有分size咩。」我叫起大人冤枉。
不過我知道她收到戒指時好開心，後來隻戒指戴了好多年，戴到變形都捨不得換。
「欵，妳知唔知邊個係社科楊C妮？」我嗱嗱臨轉話題，避免再在戒指和手指之間糾纏。
阿心茫然的擰擰頭。
我續說：「Winnie Tam喎？佢表哥阿材呢？」
「唔識呀，咩人嚟㗎？」阿心仍在擰頭。
似乎校花傳說只在男生之間流竄，只好又解釋一遍事情的始末，最後告訴她要幫老表做男伴游。
她聽後反應平和：「人哋幫咗你，你幫返人，唔係天經地義咩，咁樣先係朋友，做人先唔會獨家村嘛。我成日都叫你幫人㗎。」