《我老婆唔係我女朋友》【那些年／九十年代學界／真人】 第七章全新中篇！: 【第七章】 肥矮毒都有市場（２）
「唔怕喎，Zoe呢鋪贏到開巷，又贏埋牙骹，佢唔爆邊個敢爆吖，你當趙氏流㗎？聽講今次個投注額去到成卅幾雞，買到架車呀，班Hall友攞埋伙食費瞓身去賭，想煲爆個莊等佢出醜。恐怕係因為你嗰次傷咗之後，行路行到掗吓掗吓個死樣傳開咗，加上又拎咗個全場最渣嘅排位，而且又無往績可以捉路，所以超過八成人都買你入唔到決賽，啲過關盤輸死好多人呀。」Leon又來賽後分析，不過是集中賭局方面。
Leon一說，我就想起之前墳哥他們的表現，不住找機會套取我的狀態，又做筆記紀錄我最佳時間，見我受傷又擔心我不能出賽，凡此種種應該都是因為這場賭局了。
Leon看看時間，趕我返回班房：「喂唔講嘞，我返歸喏，你都返入去『淥個麵』，順便湊女友放學啦。」
放學坐地鐵時跟阿心說起場賭局，她也大感意外。「吓？！原來玩到咁大㗎？我仲以為班裡面啲同學圍內輸賭吓㗎咋。哦，唔怪得Leon得閒就問吓你狀態點啦。」她有點恍然大悟。
我拖起她手，看看新買給她的戒指。「不過你畀啲貼士都好準吖。」
我接著再說有人出錢，贏就我袋，輸就他畀的「荀盤」。
阿心皺眉有點不悅：「噫～賭錢真係唔係幾好啦。」耶教中人視賭博為如同犯十戒的死罪是常識吧。
「唔好話我啦，又唔係我賭，當幫補吓啫，買咗戒指畀妳，今個月好窮呀。」我知道嗲她一下，她就不會再哦我了。