《我老婆唔係我女朋友》【那些年／九十年代學界／真人】 第七章全新中篇！: 【第七章】 肥矮毒都有市場（１）
肥矮毒都有市場
回程時我打開阿材本書，有兩張金牛夾喺裡面。「嘩，成兩叉嘢喎，你要收返幾多本呀？」
「啊，畀返五舊本我得啦。」Leon輕鬆答道。
「咦？你自己無買咩？」我好生奇怪，點解唔計埋自己嗰份。
「無呀，我都無乜閒錢落欖㗎。」Leon順口說道。
「噉不如一人一半啦，我坐享其成好似唔係幾好。」他根本可以不必告訴我有落欖的。
「門小你咩，你落場砌喎，我先係坐享其成嗰個，袋埋啦。」Leon笑著罵我。
「咁好啦，多謝嘞，今個月聽你講買咗禮物畀阿心，窮到燶，呢啲真係及時雨。」我由衷的感激Leon的體貼。
「係呢，今次個比賽成績幫唔幫到手呢？」比完賽到現在才有時間問他。
「呵，體委幾滿意呀，一參加返就達標喏，仲想點呀，而家傾緊來年會增撥資源喎，不過下學年先算啦，落咗莊就理得佢死。」Leon頓了頓再問我：「但下年真係再游，你仲制唔制呀？」
「而家開始操返，又無乜所謂嘅，最怕個火圈愈跳愈細，一陣搞到要攞牌先滿意就煩啦。而且我去比賽，阿心仲辛苦過我，我最唔想佢操勞囉。」我無可無不可，瘦妹原本已經麻甩，仲要搞到佢對手粗晒，成身藥油味，真係唔值得。
Leon點點頭：「明嘅，你條囡又真係好緊張你。呀，老表單嘢記得稟報老佛爺呀，一陣小器你黐住校花去玩水就煩嘞。哈，雖然呢啲機會唔係你嘅。」
「得啦，我『窮過蒙正』啫，唔係『懵過蒙能』嘅。話時話你搵老表落欖會唔會累到佢㗎？」我反而有點擔心老好人被連累。