《我老婆唔係我女朋友》【那些年／九十年代學界／真人】 第七章全新中篇！: 【第七章】 表哥與表妹（４）
「欵～唔使預我，叫阿仁幫你啦，我幫口同佢教練講，我保證佢一定同意。」Leon極速推莊。
「我門小你轉軚轉得咁快嘅！？」我指著Leon來罵。
這時候老好人出聲了。「誒…兩位唔好嘈喇，不如…算啦，都係唔去嘞。」
我和Leon你眼望我眼，條友又會咁純情嘅，不一會一起大笑。
我又再摟著阿材膞頭：「癡線仔，同你玩吓啫，你叫我幫你跳海我都義不容辭啦，去水上樂園點會唔去呀。」
Leon搭嘴：「佢個教練縱壞佢，點會唔准佢接Job呢，何況仲有機會見到大名鼎鼎嘅表妹？阿仁一世都無呢啲機會啦。」
Leon再哄近老表，悄聲的問：「喂，聽講表妹仲係A喎，呵？」
阿材表情有點錯愕，但仍舊滋油淡定的回應：「你喺邊度聽到㗎～」
我和Leon同聲齊問：「佢O咗咩！？知唔知男朋友係邊個？」
A=Available O=Occupied，唔係唔識嘛。
阿材推推眼鏡，繼續好整以暇：「咳…失禮，正是小弟。」
我和Leon張大了口，久久不能合起來。
「你個仆街監守自盜，表妹都搞？你禽獸不如呀～」我又一把推開阿材。
「欵，冷靜啲，我哋疏堂表兄妹咋。」阿材叫起冤枉。
「闔家祥，你簡直係全校男同學公敵，阿仁由得佢浸死啦。」Leon附和。
「嘿，我點會咁無人性呢，正如我頭先所講，男嘅先浸後打，女嘅橫胸拖完人工呼吸，我實會—好—好—照—顧—你嘅。哈。」我又再摟著他。
當下約定了7月31號出Job，原來當天是慶祝表妹生日。既然阿材咁幫手唔賭都落欖，又俾我哋撚咗一輪，我都唔好意思收時薪，乾脆象徵式只叫他出車馬費算了（行規是門票由僱主出的），真正無敵友情價。