《我老婆唔係我女朋友》【那些年／九十年代學界／真人】 第七章全新中篇！: 【第七章】 宿生的世紀賭局（１）
宿生的世紀賭局
原來打出木人巷，在和尚寺外面的世界，一樣可以藉由課外活動贏得友儕的尊重，只是這裡跟現實世界一樣，體育活動只有在博彩的滋養後，才會有人願意關注。
幸好馬飛等人雖然情緒低落，仍然願意供應漫畫雜誌予我消磨時間，第一節課在無甚知覺下就完結了。放break時，Leon走了進來找我，自然又引起一眾女同學的熱情呼喚。
為免多言，他拉了我出課室才說：「喂潛一陣水，我專登返嚟同你去搵『財神』㗎。」我就奇怪他為何會在學校出現，事關他並無報讀Summer course。
所謂潛一陣水就是點完名後，偷渡離開課室（阿心上星期就是這樣走堂），但又唔離開學校喎，方便有需要時隨時蒲頭，總之就走法律罅合法地唔上堂，有時借尿遁去鋤幾鋪大弟啦，甚至打四圈麻雀，或者食下午茶（煲煙呼吸），總之大家各自各精彩，反正臨落堂前返入課室，亮亮相、露個面（我哋戲稱「淥個麵」），叫做師生之間大家畀面。
剛好我有千言萬語要問Leon，似乎他是知情人士：「啱嘞，我想…」
那知他截斷我的話：「欵～你乜嘢都唔好問住，跟我過去社科大樓先。」
「吓？哦。」無奈下只好跟他走了。
於是Leon領著我急步離開商學院教學大樓，社科院其實只在一條馬路之隔，平日我們商科生甚少會到社科院，反之社科生亦然。
「我哋去B1-06…」途中Leon不停催我：「行快兩步，費事一陣『財神』收工。」