《我老婆唔係我女朋友》【那些年／九十年代學界／真人】 第七章全新中篇！: 【第七章】 回歸日常（３）
七月三日星期六，比賽後一個星期，也是Summer course的最後一課，上完就真的放暑假了。
我和阿心如常的拍住拖返到校門，一般的前後腳入Lecture hall，佢坐車頭我坐車尾，誰知道我一行入hall就馬上引起一陣小騷動，全班同學都擰頭望著我，議論紛紛，阿心在前面更加不知道我發生甚麼事。
我心中嘀咕著，喂唔使啩，上星期走咗一堂啫，唔係噉都被捕吓嘛？唔通上Summer course都要retake？明明請咗事假啦。
到我行返馬飛旁邊的座位到時，我大致聽到兩種聲音，原來都是有關上星期的比賽，一幫人在讚賞我游得好，幫佢哋贏到錢，另一班人就咀咒我廢，連累佢哋輸錢。
贏錢、輸錢？究竟發生乜嘢事呀？我一頭霧水，連忙問馬飛。
「唉～你唔好問我，唔講得㗎。」平日口若懸河的馬飛，今日竟然死狗一條。
「呵，睇你個仆街，滿面黑氣，你都有份輸錢啦。」我隱約覺得，佢哋應該都係輸賭我校在比賽的成績。
乘機落井下石恥笑他：「叫你唔好賭㗎啦，有錢唱吓K咪好囉，哈哈哈哈。嗰陣笑狗我肥仔水泡？以為我無料到，輸隱死你呀。」
正在旁邊「熱烈地彈琴熱烈地唱」之際，我打橫望過去，馬飛、墳哥、阿仙全都殺氣騰騰的瞪著我，突然有點笠水，一陣發窮惡會唔會劏開我肚腩呢。「唏，講吓笑啫，唔係真係輸身家啩？」
他們全都一副垂頭喪氣的模樣，不再理睬我，這時候又有一班似乎是贏家的同學，「喜氣洋洋」的走過來，問我有關比賽的情況，又讚嘆我短時間都可以回復狀態入到決賽之類，只是無論我怎樣追問有關那個賭局的內容，個個都支吾以對。