【校園／愛情】戀上鄰家女孩（布甸篇）: 69. 意外的默契撮合

要講到我同子瑜嘅關係，我總覺得無咩可能三言兩語就可以解釋清楚，而如果真係講嘅話，又應該由幾時開始講起好呢？

我記得中一嗰年聖誕聯歡會之前嗰個禮拜，班主任Miss Wong提議我哋不如當日玩交換禮物，而且仲加咗一種玩法，就係每個同學輪流出去抽籤，張紙仔裡面會寫咗另一位同學個名，班主任話我哋要根據嗰位同學嘅喜好，揀一份禮物喺聯歡會當日送俾佢，價錢唔可以超過一百蚊。

班主任加多咗條規則，喺聖誕聯歡會之前絕對唔可以同任何人講你抽中咗邊個同學，要保持神秘，到時候先至會有驚喜，其實班主任嘅用意除咗藉此俾我哋認識下新朋友，就係可以俾我哋學識點樣透過日常相處去觀察你嘅對象會鐘意啲乜，結果到我最後一個出去抽籤嘅時候，我打開張紙仔一睇，只係一個再熟悉不過嘅名字。

返到埋位坐低之後，子瑜陰陰嘴笑拍我膊頭，問我抽中咗邊個。

「你講先吖。」我嘗試去䚎子瑜張紙仔。





「唔好咁小學雞啦，快啲話我知。」結果子瑜仲狼死，想伸手搶我張紙仔，我即刻收落褲袋，跟住叉住手再顎高個下巴對住佢。

去到小息嘅時候，曉琳已經撲咗埋嚟，問子瑜抽中咗邊個。

「佢唔會講㗎喇。」我幫子瑜答埋。

「點解啊？咁你呢陳佑男，你抽中咗邊個？」跟住曉琳擰過嚟眼眨眨咁望住我。

「佢都唔會講㗎喇。」子瑜幫我答埋。





「咁曉琳你呢？你抽中咗邊個？」子瑜捉住曉琳隻手問。

「唔...我抽中咗個唔係好識嘅男仔。」我留意到，曉琳無意之間流露出失望嘅表情。

「都好吖，可以趁機識下新男仔，曉琳我哋今日放咗學係咪一齊去買衫？」子瑜企起身翹住曉琳隻手一齊行出課室，我知道呢個又係佢哋兩姊妹嘅私人時間。

「係呀。」曉琳嫣然一笑。

「係呢，早排子瑜你同陳佑男唔係嗌緊交㗎咩？你哋終於和好嗱...？」隨住佢兩個漸行漸遠，曉琳嘅聲線亦都越嚟越微弱，更加無辦法聽到子瑜點樣回答曉琳呢條問題。





我同子瑜嗌交互相唔睬對方，係因為子瑜掉咗我哋喺迪士尼嗰張即影即有，唔知子瑜會唔會將呢件事講俾曉琳知呢？

不過點都好，話咁快就嚟到聖誕聯歡會呢一日，我帶住份禮物返到學校課室，其實心情係好戰戰兢兢，因為我都唔知自己呢個決定到時候會換嚟咩嘢反應。

點知道交換禮物環節一開始，我就係第一個俾班主任叫出嚟嘅同學。

「佑男，你可唔可以同我哋介紹吓你份禮物呢？」Miss Wong嘅聲線總係咁溫柔。

「係一個布甸狗銀包...」

「咁你抽中咗邊位同學啊？可以叫埋佢出嚟，將你手上呢份禮物親手送俾佢，順便講吓點解會揀呢份禮物俾佢吖。」

「欸...其實我無抽中其他同學...」我睄到班主任嘅表情開始有啲驚訝。

「其實我抽中咗自己...我想送呢份禮物俾自己...」





話音未落，我已經聽到課室角落有幾個女仔喺度放聲大笑，而呢幾個女仔就係之後中四同子瑜同班，嗰幾個讀VA，壁報板比賽將所有嘢掉晒俾子瑜一個人做嘅八婆。

「哈哈！笑死我喇，送俾自己...男人老狗仲要學人鍾意布甸狗。」

唉，我都話㗎啦，早知會俾人笑，當初抽到自己嘅時候就應該勇敢啲同班主任講，睇吓有無得再抽過，之不過嗰幾個女仔就越笑越大聲，我眼角望見曉琳憂心忡忡咁來來回回望住我同嗰幾個女仔，一副想幫我解圍但又束手無策嘅樣子。

呢個時候我都唔知道自己企喺度仲可以做啲咩，但係我喺度諗，我抽中自己，想送禮物俾自己又有咩錯。

正當班主任想開聲幫我打圓場嘅時候，電光火石之間子瑜企咗起身，由佢嗰位一步一步咁走埋嚟我度。

「呢張紙仔先係你㗎，做乜擸咗我張紙仔當係自己啊，你出嚟搞笑啊？」

子瑜將佢張紙仔塞喺我手掌心裡面，然後接過我個布甸狗銀包，返埋位嗰陣仲向住嗰幾個笑我嘅女仔怒睥住佢哋，我攤開掌心打開張紙仔，張紙仔早已經摺到皺晒，但裡面清清楚楚寫住三隻字——





「黃子瑜」

原來呢個衰妹同我一樣，都係抽中自己個名，但又唔同Miss Wong講要換。

回想返起，嗰陣時我一直都覺得，黃子瑜對我嚟講係一個好特別嘅存在，其實我都唔知我同佢之間嘅關係可以歸納喺咩類別裡面，但如果我真係當子瑜係戀愛對象嘅話，兩年之後升中四嗰個暑假，我就唔會同佢講跟住落嚟嘅呢番說話。