【校園／愛情】戀上鄰家女孩（布甸篇）: 70. 再一次跟你告白

由中三升中四嘅暑假，呢段日子唔使返學，我以為自自然然就會對呢個女仔嘅情感慢慢丟淡，點知道即使我同曉琳少咗見面，我發現自己個心依然成日會不由自主咁諗起佢，越想去控制自己嘅感覺，就越掛住佢。

而當我哋三個約埋一齊出街嘅時候，我發覺自己會越嚟越留意佢嘅每一個舉動、每一個眼神，我會在意喺佢面前嘅形象，只不過原來以上嘅細微動作，早已經俾子瑜看在眼內。

呢一日我哋三個約出嚟睇戲，睇邊齣戲我都唔係好有印象，反而我就好記得入戲院之前發生過嘅事。

「我想買桶爆谷入去食啊，但係我哋仲趕唔趕得切？」曉琳問，我仲記得曉琳嗰日嘅裝扮係一條連身嘅工人款式牛仔布短裙，加埋佢嘅笑容，處處散發住一種青春少艾嘅味道。

「仲趕得切嘅。」我探頭一望小食部只係得一兩個人排緊隊，況且依家距離上映都仲有幾分鐘時間。





「咁我哋食咩味好，焦糖味定係朱古力味好？」曉琳扯住我衫袖重覆問咗我兩三次，而子瑜雖然企喺旁邊但就全程都無出過聲。

「曉琳你鐘意食咩味？」我問。

「搞錯啊，你都唔了解我嘅，你估吓吖。」我隱隱約約聽到子瑜喺我背後偷笑咗一聲。

「焦糖味？」

曉琳擰擰頭，眼神失望。





「咁啫係朱古力味！」其實都係得兩款味揀咋，所以唔係焦糖就係朱古力味。

「係啊係啊，我哋買一桶大嘅定係細嘅好啊？」我估中咗之後，曉琳開心到直頭拍晒手掌，呢個傻妹今日心情好似好興奮咁。

「子瑜你食唔食啊？」曉琳轉身問子瑜，但見子瑜有啲心不在焉。

「呀？我唔食啦，你哋食啦。」

「咁我哋買桶細嘅吖，我怕我食唔晒，你到時可唔可以幫我食啲？」





講真嗰句，曉琳咁樣問到，我又點會托佢手踭吖，不過買完桶爆谷之後時間已經所剩無幾，但係曉琳仲話想臨入戲院之前去多轉廁所先。

「子瑜你要唔要一齊去？」曉琳捉住子瑜隻手仔問，唔知點解女仔就係好鐘意約埋一齊去廁所，調返轉如果有男仔約我一齊去廁所我實會打冷震。

「曉琳你去吖，你有無帶紙巾啊？我呢度有一包。」

當子瑜將包紙巾遞俾曉琳之後，再目送曉琳身影消失於廁所門，就即刻擰返過嚟用一副鄙視嘅眼神望住我。

「做...做咩事...？」而我...竟然有啲心虛添。

子瑜個衰妹一直望住我對眼又唔講嘢，但佢就算無講嘢我又好似估到佢想講啲咩，我開始對住佢尷尷尬尬咁傻笑。

「你幫我揀吖～焦糖味定係朱古力味好啫～～？」而個死女包仲要扮埋曉琳頭先嘅語氣，我除咗捧住桶爆谷傻笑之外俾唔到第二啲反應。

「鐘意咗人啊？唔怕認喎，呢度得我同你，我唔會講俾曉琳知㗎。」子瑜仲要一拳打落我手臂度，好在佢只係細細力，如果唔係我一甩手，曉琳桶爆谷就會落地開花。





當曉琳喺廁所出返嚟嘅時候，佢見我同子瑜兩個喺度竊竊私語咁唔知傾緊咩秘密，佢即刻幾下小跳步走埋嚟想八卦下我哋講緊啲咩，不過我同子瑜就好有默契咁轉咗另一個話題，之後走埋入戲院再無交談機會。

咁梗係啦，現階段嚟講我真係唔想俾曉琳知道我鍾意咗佢，而我好唔好俾子瑜知道呢件事呢，我就足足用咗成套戲嘅時間去思考，亦最終得出咗答案。

睇完戲，食埋飯，曲終人散，終於等到分岔路上曉琳同我哋講拜拜，我可以單獨同子瑜講出我嘅心底說話嗰陣時，點知都未等我開口，子瑜就已經搶先一步。

「做咩唔送埋人哋返屋企啫？」子瑜失驚無神伸隻手過嚟摙我手臂。

「嘩，痛啊！」

「唔使怕醜喎，定係怕人哋曉琳會拒絕你啊？」我都無講啲咩但係子瑜就已經不斷追擊住我。

「點解你會知嘅？」我係擔心我太過明顯，會俾曉琳發現。





「你理得我啫，喂陳佑男我認真問你，你係幾時開始鍾意曉琳㗎？」

「吓...欸...我諗係上學期陸運會早嗰排，我哋嗰陣咪成日落運動場練跑嘅，跟住我發現自己好似多咗留意佢...」

「啫係中三嘅上學期？」由唔知幾時開始，子瑜收起咗嬉皮笑臉嘅表情，神情漸漸變得正經。

「嗯。」我點頭。

跟住子瑜走前兩步，然後突然回身望住我。

「咁我呢，你有無鍾意過我？」

黃子瑜你今次又想玩啲咩...

我心裡面有種感覺係，喺子瑜面前，我勉強仲可以簡簡單單承認自己鍾意曉琳，由幾時開始鍾意呢啲問題都可以坦白從寬，但當子瑜突如其來問我有無鍾意過佢，要我霎時間面對呢個問題，我個腦就自動短路，但係我又唔捨得直接話無鍾意過佢。





「欸...」我只能夠支吾以對。

「講笑咋～」子瑜見我欸嚟欸去都俾唔到答案，跟住就轉身走人，我本能反應即刻追上前。

「黃子瑜你去邊啊？」

「嬲你啊。」

「做咩無啦啦嬲我喎，你之前又話以後都唔會嬲我嘅。」

子瑜越行越快，我處於被動一直從後追趕住。

「之前還之前，總之依家嬲你。」