【校園／愛情】戀上鄰家女孩（布甸篇）: 68. 屬於我倆的秘密

我以為，曉琳至少會大吵大鬧一場，問我點解一直以嚟要瞞住佢，又或者放聲大喊釋放自己從頭到尾被蒙在鼓裡嘅苦澀，但奇怪嘅係以上統統都無。

曉琳變到好安靜，一直坐咗喺客廳張梳化到，發晒呆咁望住部電視機，但係個螢光幕除咗曉琳個倒影之外乜都無，而我就喺梳化旁邊，坐喺地下抬頭望住曉琳。

有時候曉琳都會轉換一下坐姿，但係唯一不變嘅係曉琳並無離開過張梳化，佢視線偶爾都會四周溜轉，甚至乎目光會經過我臉孔，但係好快又會迴避我嘅眼神。

我哋兩個就係咁坐咗喺度，一粒聲都無出過，時間唔知過咗幾耐，沉寂嘅空氣一直蔓延至我屋企每一個角落。

此時此刻我都唔知可以點樣解釋，我嘗試去詮釋曉琳依家心裡面嘅諗法，但係佢一句說話都唔講，我完全係處於束手無策嘅狀態，我越想諗啲嘢講，就越唔知講啲咩好，久而久之坐耐咗，仲連開口講嘢嘅勇氣都無埋。





「不如你去睇吓子瑜吖好唔好？」最後曉琳喺我最唔為意嘅狀態之下，講咗一句出乎意料嘅說話。

「吓？唔使啦。」

「如果唔係我阻住你，你就可以過去探子瑜...」

「點會...」

但我呢句衝口而出嘅「點會」，可以話係一啲說服力都無，連我自己都呃唔到，我又點能夠奢望曉琳聽完會相信。





我仲記得某年暑假，我同樣病到起唔到身落唔到床，子瑜喪敲我道門，我心裡面暗罵做乜鬼我病到七彩都仲要過嚟煩住我，點知佢二話不說就捉咗我落去樓下間診所排隊睇醫生。

等緊醫生嗰陣，我對眼幾乎擘都擘唔開，迷迷糊糊咁耷低頭望住自己著住嘅嗰對睡房拖鞋，子瑜忽然間擰住我隻耳仔。

「你病咗就要去睇醫生吖嘛，食咗藥先會好返，知唔知？」

我已經唔係好記得當時我答咗啲咩，不過對於我呢個由細到大都諱疾忌醫嘅細路嚟講，子瑜教識咗我一樣嘢，就係有病就去睇醫生，所以我同曉琳拍拖嘅第一日，當我聽到曉琳話佢朝早發燒起唔到床嗰陣，我第一個反應就係捉佢去睇醫生。

黃子瑜你無意之中教識我嘅嘢，我亦都無意之中運用咗喺另一個女仔身上，諷刺嘅係去到今日你發燒病咗，反而我咩都做唔到。





「你仲記唔記得，以前中一嗰陣你同子瑜放咗學會一齊返屋企，初初我跟埋過嚟，但係你哋兩個就會好似夾埋咁，行到去某個位就借啲意使開我，後來我有自知之明，去到嗰個位我就識自己講byebye，唔使你哋講我都會識趣自動自覺行開，而你哋又真係唔會挽留我行多段路。」

曉琳娓娓道來呢番說話之後，又再轉換坐姿，今次輪到雙手緊緊抱住自己膝頭，然後又繼續講埋落去。

「嗰陣時我喺度諗，你同子瑜嘅關係肯定唔係純粹朋友咁簡單，肯定有啲唔見得光嘅事，但又唔想俾我呢個外人知。陳佑男你仲記唔記得我曾經問過你，我問你當子瑜係咩，當時你諗咗一兩秒，跟住你話你當子瑜係屋企人，但其實個答案應該係，子瑜係你個ex。」

雖然曉琳目光依然向前凝視，但係佢剛才嘅每一字一句都猶如一粒接住一粒嘅震撼彈，不斷來來回回咁重擊我心臟。

「唔係啊，我哋無啊，唔係你諗嘅咁㗎...」

「咁到底你哋係咩關係？」曉琳追問。

或者相比起我同子瑜係鄰居嘅呢個秘密，曾經，我同子瑜喺中一假扮情侶嘅呢件事，同樣都係埋藏喺我哋兩個心底之中唔想俾任何人知道嘅秘密，但點知道原來喺曉琳眼中，早已經破綻百出，事到如今我已經再無逃避嘅餘地。