【校園／愛情】戀上鄰家女孩（布甸篇）: 54. 萬里晴空一撮黃
大叔帶我哋嚟嘅呢間餐廳，裡面嘅古典裝潢擺設，令人有種彷如置身城堡嘅錯覺，黃子俊興奮到係咁捹支棉花糖，但每當子瑜想伸手搶返嘅時候，佢細佬都可以輕易避開。
而我呢，頭先喺門口排隊嗰陣，𥄫過一眼個餐牌，唔係雜扒就係意粉，連兒童餐都要三位數，暗地裡擔心緊我個荷包負唔負擔得到...
我哋四個坐低之後，子瑜就對住大叔講：「我同陳佑男出去買嘢食。」然後就捉住我隻手想抆我起身。
「阿男朋友仔你坐低，我同子瑜出去買，你幫我好好睇住子俊就得。」
「唔要啊。」子瑜又再俾力抆咗我一下。
「乖啦，當陪吓老豆傾偈。」同一時間大叔向我打咗下眼色，意思即係叫我坐定定。
既然大叔咁樣講到，子瑜最終都係順從跟咗大叔出去買嘢食，臨走之前大叔仲好好人咁問我想食咩，點知子瑜就搶咗我發言機會。
「佢？佢咩都食㗎。」
咁...都無講錯嘅，不過最好唔好買個太貴嘅餐囉，我怕找唔到數，始終我唔似得坐我對面嘅嗰粒豆釘，可以咁無憂無慮。
「男朋友！」黃子俊揸住支棉花糖，㨃埋嚟我塊面度。
「我唔係男朋友，我叫陳佑男。」
「男朋友！哈哈哈！」
唉...我諗都係溝通唔到㗎喇。
坐咗陣之後，餐廳人流越嚟越多，放眼望過去買嘢食嗰條人龍塞到密密麻麻，子瑜同大叔已經消失咗喺人海之中，而呢邊黃子俊食棉花糖就食到津津有味，但係啲棉花糖黐晒喺嘴邊，唔知以為佢想扮聖誕老人，我諗起啱啱大叔先叫我好好睇住呢個細路。
「抹下個嘴先啦，一陣俾你家姐見到你食到咁哩啡，實鬧死你。」
我拎咗張紙巾幫黃子俊慢慢抹乾淨個嘴，你問我點解明明係佢老豆託我睇住佢，但係我就撻咗佢家姐出嚟？係啊，我認係出於私心，想借佢細佬打探口風。
「黃子瑜唔會鬧我，佢剩係鬧你。」
「吓？你家姐會鬧我咩？」我一邊幫佢抹嘴，一邊豎起耳仔等聽內幕。
「男朋友你要唔要食？分啲俾你食吖。」
算喇，真係牛頭唔搭馬嘴，溝通唔到。
過咗無耐，子瑜就同大叔推住架餐車返嚟，當大叔將啲餐盤搬上枱嗰陣，我同子瑜對望咗一眼，先發現佢雙眼水汪汪，嘴扁扁，依稀可見仲有條未乾嘅淚痕留咗喺臉頰之上。
「望咩喎，幫手搬嘢食啦。」子瑜喺餐車下格拎咗碟米奇老鼠形狀嘅薯餅俾我。
「你無事吖嘛？」我細聲安慰問。
至於點解子瑜同大叔出去買嘢食，會眼濕濕咁返嚟，就要等佢後來同我講返我先知道。
而正正喺呢餐飯過後，子瑜開始無咁抗拒大叔，又願意花更多心思喺佢細佬身上，飯後行程唔再係分開各自玩，終於變返四人行，因為佢細佬仲細，所以我哋都係玩啲合家歡遊戲，例如係坐住架木造嘅船，喺條假嘅河上面，俾隻膠造嘅大笨象兜口兜面噴濕塊面。
雖然我知道呢條河只係搭建出嚟嘅假象，但係身體感受偏偏又如此真實。
就好似，雖然子瑜叫我做佢男朋友，但以佢成日整蠱我嘅前科，究竟佢有幾多成當我係佢男朋友，真係得佢先知道，咁但係調返轉我有幾多成當佢係我女朋友，佢...應該都無興趣想知㗎喇。
更何況當四個人一齊行嘅時候，子瑜要幫手照顧住佢細佬，再無空餘時間去理我，幫佢細佬抹汗餵水呢啲已經算小事，仲要時刻滿足佢各項奇怪要求先至辛苦。照顧一個小朋友已經唔簡單，尤其係當你都只係一個年紀佢大幾年嘅小朋友，就更加唔容易，而會照顧人嘅女仔仲有一種獨特嘅吸引力存在住...
「黃子瑜，點解唔見你同你男朋友拖手嘅？」估唔到呢粒天真無邪嘅豆釘仲記住呢件事。
「我依家咪拖緊你隻手囉，你唔鍾意咩？」但子瑜巧妙咁避開咗個重點。
「咁即係我係你男朋友啊？」黃子俊抬高頭問佢家姐。
「哈哈哈！黃子俊，你唔可以做你家姐男朋友㗎，咁樣會亂倫㗎。」身處一旁嘅大叔插嘴。
「咁邊個先可以做黃子瑜男朋友？」黃子俊擰轉身問返佢老豆轉頭。
「呢個咪得囉，簡單就手直接了當。」大叔指住我。
「咁你哋快啲拖手啦。」
忽然間黃子俊失驚無神走埋嚟我度，捉住我隻手搭喺佢家姐隻手度，仲認認真真咁幫我哋十隻手指，由尾指開始慢慢扣好。
「做咩啊你黃子俊？」子瑜焦急道。
「唔好郁啦，幫你哋拖手啊，嘻嘻。」
手指公都扣埋之後，我同子瑜胡裡胡塗就十字緊扣住對方，跟住就聽到大叔嗌黃子俊埋去佢度，唔知幾時開始佢手上面已經多咗部即影即有相機，仲要紥定馬，連揸機姿勢都擺好埋...
我依家先發現，原來我同子瑜正身處今朝跑入嚟嗰條大街之上。而不知不覺間，湛藍嘅天空已經俾一撮淡黃佔據住，而且感覺仲越嚟越濃厚。
「望鏡頭，笑～」大叔仲要舉高隻手示意鏡頭位置。
咔嚓——
相紙慢慢從相機上面褪出嚟，同時間子瑜已經甩開咗我隻手。
「哎呀係玉桂狗喔，唔係子瑜最鍾意嘅布甸狗添。」大叔拎住張新鮮出爐嘅相紙準備同黃子俊一齊欣賞。
「俾我啊！」結果下一秒鐘就俾子瑜嬲爆爆咁，走去大叔度想搶走咗張相紙。
「未曬到出嚟喎，做咩子瑜你咁心急想睇啊？」大叔瞬間變咗做大細路。
其實我都想睇吓張相影成點，但係子瑜好似唔係咁諗...
「我要拎去毀屍滅跡。」