【校園／愛情】戀上鄰家女孩（布甸篇）: 55. 雲霧繚繞撥不開

轟隆——！！

一聲雷響將我從回憶之中抽離。

三年前嘅記憶大概就嚟到呢度，雖然隨住時間流逝難免會開始變得模糊，但原來只要稍加刺激，回憶依然會一下子重新浮現。

而且我仲記得，第二日返學嗰陣，我問你係咪真係掉咗張合照，你實牙實齒話當日已經即場掉咗落垃圾桶，我哋因為呢件事鬧咗場交，隔咗成個月先至和好，誰不知你只係偷偷地收埋咗，仲要放喺呢個布甸狗銀包裡面。

既然你無掉到相，又點解要對我講大話？





「喂！靚仔係咪買遮㗎？喂喂？哎呀而家啲後生仔咁細個就撞聾。」老闆娘再三催促。

「係係，唔該你老闆娘。」

俾完錢，接過老闆娘把遮之後，我沿路穿過幾個檔口，只要再轉多個彎，就可以見返子瑜。

誰不知子瑜一見到我，就跑埋嚟大大力搣我手臂。

「你去邊嚟啊？去咁耐，我啲電話銀包都喺晒你度㗎。」子瑜嘟起個嘴睥住我。





「嗱，啱啱買㗎。」我將把遮遞喺佢面前，順便遮掩我嘅心虛。

「你話要落街買嘢，就係買遮呀？」子瑜用疑惑嘅眼神望住我問。

「係啊，頭先出門口前我咪話會落雨嘅，但係你又唔理我，如果我唔去買把遮，出面咁大雨我哋點返屋企？」我指向街市門口方向，明明依家先五點幾，但個天已經黑晒咁滯。

就算門口同我哋所在位置有一段距離，單係嗰種啪喇啪喇嘅雨聲，都可以感受到出面落緊幾大雨。

「知你叻喇，咁你幫我拎埋呢袋啦。」子瑜直接將華哥袋免治豬肉塞俾我，然後就向住門口方向離開，我即刻急急腳追返上佢。





出到街市，雨水同把遮嘅碰撞聲，將四周圍嘅環境雜聲幾乎隔絕。

「你著住拖鞋小心啲行啊。」沿途我一直放慢腳步，擔心子瑜行得太快會跌親。

依家呢個環境大雨到連笪地都開始水浸，我褲腳一早已經淋濕晒，但係子瑜著住拖鞋就更加狼狽，啲積水係咁啜住佢對鞋，睇見佢每步路都舉步維艱就覺得辛苦。

我將把遮移向子瑜嗰邊，寧願犧牲自己右手俾雨淋，我都想幫佢盡量擋走啲雨水。

唔知點解，我想對呢個女仔好啲，係因為我哋已經識咗咁多年？定係想彌補某啲嘢？抑或係出於憐憫？我自己都唔知道，剩係知道，其實都唔係得好多機會可以俾我咁做。

而呢個時候，子瑜粒聲唔出攝咗隻手埋嚟，輕輕搭住咗我手臂。

子瑜呢下突如其來嘅舉動，真係令我有啲始料不及，而且都好少可以見到佢小鳥依人嘅呢一面…

我擰轉頭見到子瑜依然耷低頭，繼續小心翼翼咁步步為營，而我，就默默咁陪住佢慢慢行。





我哋兩個人好有默契咁，全程都無再講過嘢。

或者，身體語言已經足以取代一切。

雖然呢刻我無辦法窺探到子瑜嘅表情，只不過我覺得有時候有啲嘢，其實都無必要咁清楚吖。

呢段返屋企嘅路，平時五分鐘嘅路程，我哋好似用咗超過一倍時間都未完成，但總算嚟到最後一關，過埋條馬路就達陣。

「咁耐都未轉燈嘅？」子瑜搭住我手問我。

「你又唔係唔知呢盞燈不嬲都神神哋。」我答。

等咗一陣，盞燈依然無反應，但雨勢有如瀑布傾瀉。





轟隆——！！

呢下雷響有如喺頭頂上面炸落嚟。

「不如衝燈囉？反正都無車。」子瑜忽然提議。

「吓？好危險喎，如果突然間有車咁點算？」

「咁如果盞燈永遠都唔肯轉呢？」子瑜再問。

「點會啊…」我有啲摸不着頭腦，做咩子瑜問埋晒啲莫名其妙嘅問題。

正當此際，子瑜搭住我手臂嘅觸感突然間消失咗，下秒鐘佢已經衝咗出馬路，呢下轉變完全喺我意料之外，但我當下嘅反應已經係提起腳步追住佢。

「子瑜！！」