【校園／愛情】戀上鄰家女孩（布甸篇）: 53. 掉進海的棉花糖

「喂！做咩發晒吽哣咁啊？要走喇我哋，再唔走就要俾人趕㗎喇。」忽然間我大脾一陣劇痛，回過魂後，先知原來係子瑜大大力摵咗我一下。

「係...」我只能夠發出微弱嘅回應。

離開旋轉咖啡杯之後，唔知點解頭先子瑜捉實我隻手嘅感覺，突然變得好虛無縹緲，就好似從來無發生過咁。

同樣地，子瑜都好似當頭先嘅事從來無發生過咁，仲記得本來子瑜話要我扮佢男朋友一齊玩，但係入到嚟之後佢好似都已經無咗回事，其實係咪只係我一廂情願？

「咁我哋依家去玩咩？」連我自己都估唔到，連續受過三次刺激嘅我，居然會主動提出請求。





「唔玩嚕，你陪我去買嘢食吖。」子瑜又再捉住我隻手。

原本聽到佢講唔玩嗰陣，我仲有種失落感覺，但當佢叫我陪佢去買嘢食，又再捉住我手腕嘅時候，我精神又莫名其妙咁重新振作起嚟。

我哋嚟到一座小食亭面前，子瑜喺部爆谷機同棉花糖機之間，來來回回咗望咗好幾次，搞到兩個收銀哥哥都忍唔住笑。

「喂！你覺得食棉花糖好吖，定係食爆谷好吖嗱？」子瑜小跳步跳到我面前問。

當我諗起，頭先見到有個男仔餵佢女朋友食爆谷個甜蜜畫面嘅時候...





「好似爆谷好啲。」我道出咗我嘅私心選擇。

「咁就要棉花糖啦～棉花糖開心啲。」唓，原來你一早就有決定嘅，咁你又問我...

不過睇住棉花糖嘅誕生過程，由幾粒砂糖攪吓攪吓，慢慢變成一條條糖絲，再形成一團棉花狀球體，講真又的確係幾治癒嘅。

當收銀哥哥將製成品遞俾子瑜之後，佢興奮到好似個細路女咁，舉高支棉花糖當正係寶貝咁欣賞。

「做咩眼甘甘咁望住佢？嗱！見你咁想食就分啲俾你啦。」子瑜搣咗一塊出嚟伸喺我面前。





當我想接嘅時候，佢又即刻縮返手再放落自己嘴入面。

「哈哈，無你份，唔～好味道。」

你個黃子瑜！又玩我...

「我要食啊。」

「唔俾你！唔俾你！」子瑜將支棉花糖向左邊移開，確保我就算伸長隻手都唔會掂得到。

就係呢個時候，子瑜左邊閃過一個矮小嘅身影擦身而過，一枝箭咁拔足狂奔，當我理解到發生咩事嗰陣，子瑜手上面嘅棉花糖已經成支不翼而飛。

「喂！黃子俊你同我企喺度啊，做咩搶我支棉花糖？」子瑜即刻追住佢細佬跑。

本來我準備跟住子瑜跑，不過忽然間有條粗壯臂彎從後搭住我膊頭，嗰股氣場瞬間將我雙腳凝結在地，動彈不得，但偏偏背後傳來嘅聲線，又有種反差嘅柔情。





「欸咪等佢哋兩姊弟玩下先囉，你點啊男朋友仔，俾咗個機會你同我個女玩咗半日，有無咩進展啊？」

我擰轉頭一望，見到佢氣定神閒咁望住子瑜同佢細佬喺遠處你追我逐，有種一切都喺佢掌握之中嘅感覺。

突如其來俾大叔咁問起，我都唔知點答好，但當我嘗試去認真思考嘅時候，大叔笑咗一聲，跟住已經鬆開咗我膊頭，慢慢走近子瑜同子俊身邊。

 「哈哈，黃子瑜，無你份，哇好好味。」另一邊廂，似乎子瑜俾佢細佬搞到無晒符。

「喂好喇好喇，我哋一齊搵間餐廳坐低食個飯先喇，好唔好啊子瑜？」

大叔一手將黃子俊成份抱起，粒豆釘仲要喺自己老豆個懷抱裡面，囂囂張張咁嗒緊支棉花糖。

「我唔要。」子瑜一直都拎唔返佢支棉花糖，早就嬲到兩邊臉頰紅卜卜。





「黃子瑜，黃子瑜，你同我哋一齊食啦。」跟住黃子俊開始喺佢老豆懷裡叫囂。

子瑜企咗喺度猶豫咗一陣，不過最終都係答應咗佢細佬。

「黃子瑜乖，請你食。」粒豆釘搣咗一塊棉花糖遞俾佢家姐。

「哼！明明就係我買嘅。」子瑜扁扁嘴咁望住佢細佬。