【校園／愛情】戀上鄰家女孩（布甸篇）: 52. 戀上這鄰家女孩

「子瑜啊，你覺唔覺得有人跟蹤緊我哋？」

「吓？有咩？」但見子瑜拎咗部電話出嚟，匆匆忙忙咁覆咗幾句message，然後就收返埋落袋。

跟住嗰種有人喺背後竊竊私語嘅感覺，忽然間又消失得無影無蹤。

旋轉咖啡杯，點睇都係一款老少咸宜嘅機動遊戲，當到我同子瑜坐定定喺個杯入面之後，佢就即刻搶先霸住中間嘅軚盤，我原本都無為意，其實邊個轉都無咩所謂。

點知道當音樂一響起，子瑜隨即露出不懷好意嘅笑容，我就知道今鋪又要中計了。





如果要講過山車同遙控車嘅共通之處，就係兩者嘅速度都係一早已經設定好，離心力同刺激感係你無辦法控制到嘅事，但係旋轉杯就正正相反，想要幾刺激完全係豐儉由人，你想舒舒服服咁坐喺咖啡杯裡面，吹住微風嘆返杯咖啡又得，或者好似子瑜咁，起勢咁扭個軚盤都得，反正時間一到，個杯始終會停。

「係咪先？所以點解唔轉快啲，刺激啲，抵玩啲吖嘛。」子瑜一邊轉，一邊解釋緊佢嘅原因。

「咁都唔使轉咁快㗎！！！暈啦喂！」我就一邊講，一邊縮低個身抗衡離心力。

「鬼叫你咁細膽...嘩你做咩搶我個軚盤...嘩...唔好咁快...停啊停啊。」

黃子瑜，今次問你死未，我終於知道呢個旋轉咖啡杯嘅真諦，邊個揸住個軚盤就邊個有話事權，我陳佑男今日就要轉到你黃子瑜嗌救命為止！





哈哈哈哈！！！同我轉啊！

再同大家講樣嘢，就算你坐過山車抑或係遙控車都好，總會有啲位可以俾你停低抖下氣，但係旋轉咖啡杯嘅可怕之處，就係你可以瘋狂咁一直自轉，完全無任何時間俾你停低喘息。

「喂，救命啊...陳佑男...啊吖！」

子瑜已經俾我轉到失去重心，成個人瞓咗喺我膊頭到。

「陳佑男！喂！停啊...」





當我轉到忘晒形嘅時候，子瑜開始伸隻手入嚟同我鬥搶返個軚盤嘅控制權，但係講到鬥力，佢女仔人家又點會夠我大力，哈哈哈，咦等陣先？

忽然間子瑜放棄咗同我爭軚盤，而係出盡全力將我搭喺軚盤上面隻手掹走，然後捉實我唔俾我再掂個軚盤。

「唔好捉住我啊，我要繼續轉。」我嘗試掙扎，但子瑜始終唔肯俾我放手。

「喂吔你唔準鬆手啊，你夠膽就試吓鬆開手吖。」仲要俾佢越捉越實。

就係咁，個咖啡杯繼續自己喺度轉，而自轉速度所造成嘅景象模糊，令到我同子瑜真係好似同外界完全隔絕咁，剩低落嚟嘅時間，子瑜都唔肯放開我隻手，我哋兩個就咁靜靜地坐喺度，由得個軚盤放喺度無再去爭，咖啡杯亦都變成無人駕駛，佢想點樣轉，想轉去邊，已經無所謂了。

有時候，我會偷偷地望向子瑜，然後撞到佢同樣地偷偷望緊我，當我哋兩個四目交投嘅時候，又會尷尷尬尬咁避開對方，只係佢始終都無鬆我隻手。

只不過，音樂終會有完結嘅時候，咖啡杯終會有靜止嘅一刻，我竟然開始有種意猶未盡嘅感覺，當咖啡杯轉動開始放慢嘅時候，我真係唔捨得時間咁快就要完，我唔想子瑜咁快放開我隻手。

經過呢短短幾分鐘，或者我已經重新體會到，旋轉咖啡杯嘅真諦，其實並唔係在於邊個搶到軚盤控制權，亦唔係在於頃刻之間嘅刺激感。





而係...

陪你一齊坐嘅嗰個人。