【校園／愛情】戀上鄰家女孩（布甸篇）: 51. 在那遙遠天空下

「陳佑男你陪我玩呢個吖，我想試吓。」子瑜未等我反應得切，又再捉住我隻手，向住一座銀白色UFO形狀嘅建築物跑過去。

從外表睇起上嚟，我真係唔知呢度嘅內裏乾坤，子瑜又唔肯話我知原來係過山車，直至到我坐入架車度，我先發覺開始有啲唔對路。

喂唔早講嘅？但當個安全扶手閂埋嚟嘅時候，我就知道我準備要受死了。

「呼，準備出發！」子瑜好興奮，我就幾乎面如死灰。

我唔知道大家細個有無幻想過，自己終有一日揸住架戰機翱翔天際，喺數之不盡嘅敵機包圍之下，將對手逐一殲滅，但係我可以話俾大家知，當我坐完呢趟過山車之後，我就已經徹底放棄咗呢個幻想。





事關除咗開頭過山車未加速嗰陣，我仲可以見到兩邊螢幕上面有幾架戰機飛嚟飛去，扮緊星球大戰之外，之後我幾乎全程都係捉實條安全扶手，耷低個頭，搏老命咁對抗住離心力，同埋盡我所能逼自己唔好亂嗌。

千祈唔可以俾子瑜知道我驚到就快暈低，好彩呢個係室內過山車，漆黑一片伸手不見五指，應該唔會俾佢見到我咬牙切齒個樣。

當我再次見返熟悉嘅起點嗰陣，我真係謝天謝地，來回地獄又折返人間原來就係咁解，我離開架過山車踏足平地嘅第一步差啲仆埋落地…

「你無事吖嘛…」死火喇，俾子瑜見到我一仆一碌咁。

「呢啲小兒科啦。」我唯有死雞撐飯蓋。





「好啦，咁你陪我玩多個吖。」子瑜又捉住我隻手，興高采烈咁拉住我去另一個園區。

今次唔使抬高頭望都知道呢度係咩主題，大大隻胡迪企喺門口同你打招呼，我就知道我哋嚟咗玩具反斗城。

「唔係玩具反斗城啊，係Toys’ Story，反斗奇兵。」子瑜即刻糾正我。

都係玩具啫，呢粒薯蛋頭係玩具，呢隻巴斯光年又係玩具，仲有呢隻彈弓狗啊，呢度咁色彩繽紛，仲唔係俾小朋友玩嘅？喂咪住先，呢架遙控車到底發生緊咩事？黐孖筋㗎？佢啱先升到最高嗰下，個角度係咪已經超過九十度角？

「我哋去排隊啦。」子瑜又捉住我去排隊。





子瑜仲話咩我哋好好彩，啱先玩過山車唔使點排隊，依家呢個遙控車又無咩人排，咁梗係啦，啲咁黐線嘅機動遊戲邊個想玩，係咪先？

當安全扶手閂埋嘅一刻，我望住眼前條軌道，就好似一條通往天堂嘅道路，只要一個加速，就會連埋我個靈魂一齊飄埋出去。

結果下一秒鐘，我身驅就俾無情嘅離心力撕扯住，靈魂亦都早已經被毁得支離破碎，而我旁邊嘅子瑜竟然仲要伸高隻手玩到忘晒形。

「呼！！！」

遙控車喺半空中來回跌蕩，搞到子瑜披頭散髮，但完全無阻佢繼續尋求刺激，而我呢？已經無辦法再進行思考喇，因為架遙控車又準備要向下俯衝喇，我又要出行力捉實個扶手喇，因為我真係好驚我個人會飛出去啊！！

「嘻嘻，原來你咁怕玩機動遊戲嘅。」落地之後，子瑜拍拍我膊頭。

「救命啊，點解你可以若無其事咁？」我今次真係費事再逞強。

「咁點解你咁驚都肯陪我玩咁好？」子瑜反問。





「咁唔通抌低你一個人玩咩。」

「哼！咁好死呀，咁不如我哋去搵返啲輕鬆啲嘅玩，好唔好？」之後子瑜一直喺度偷笑，你問我佢係咪恥笑緊我怕玩機動遊戲，又唔似係，咁點解佢會咁開心，我真心唔知，剩係知我又俾佢捉住去下一個園區。

當我個心靜返落嚟，我先發現原來樂園入面塞滿晒一對又一對嘅情侶，有啲個女仔翹實男朋友隻手撒緊嬌，有啲個男仔甜蜜蜜咁餵緊女朋友食爆谷，我再回頭一望旁邊呢個捉住我隻手嘅女仔…

唔知點解我有種感覺，我同子瑜好似都融入咗呢個情侶一對對嘅世界裡面…

「嗱，旋轉杯，俾小朋友玩㗎，啱晒你。」子瑜帶我嚟到一堆七彩繽紛嘅咖啡杯面前。

過山車就話因為係室內機動遊戲，所以喺外面睇嘅時候唔知佢葫蘆裏面賣咩藥，而遙控車就擺明開宗明義警告你生人勿近，今次呢啲咁嘅杯仔，實難我唔到啦啩？

正正係合家歡遊戲，排隊人數比頭先嗰兩個機動遊戲多好幾倍，我同子瑜固之然安份守己排隊慢慢等，但偶爾都有啲講嘢嘰哩咕嚕嘅豆釘，好似甩繩馬騮咁一味向前衝，分明就係想打尖，好幾次仲差啲撞到子瑜。





我見前面個男仔已經伸手將自己女朋友攬埋一邊，保護住個女仔，忽然間我心血來潮，有樣學樣咁，輕輕捉住子瑜對手臂，將佢慢慢移向近欄杆位置，然後我企喺外面保護住子瑜。

「做咩事？」子瑜疑惑咁問我。

「無啊，驚啲細路撞到你。」我直接答。

子瑜望住我雙眼，然後一下會心微笑。

之不過，點解我硬係覺得後面某個角落，有人喺度鬼鬼鼠鼠、竊竊私語緊…