【校園／愛情】戀上鄰家女孩（布甸篇）: 50. 明日總會放晴吧？

原本我都係抱住嚟做臨時演員嘅心態，應承子瑜做佢一日男朋友就夠，子瑜仲話我要做嘅嘢好簡單，只要我跟埋嚟一齊玩就得，點知而家突如其來要我同子瑜拖手。

老實講，我就無咩所謂…咁都係睇子瑜制唔制㗎啫，話晒佢都係女仔，無理由我主動拖佢，一陣俾人告我非禮就唔好，仲要係大庭廣眾眾目睽睽之下喎。

「唔要。」子瑜果斷擰轉身行開咗。

完全係合理預測範圍之內，子瑜又點會想拖我呢個冒牌貨。

「哎呀！子俊我哋無得睇表演喇！」我有無睇錯…大叔竟然流露出真摯嘅失望表情？





「吓？老豆，咁咩係男朋友啊。」隔離個豆釘已經不斷重複咁問。

「男朋友仔，唔使灰心喎，呢個女，由細到大都係口硬心軟，女仔都係想有人氹，氹多啲，就得㗎喇。」大叔行埋嚟搭住我膊頭，佢手臂上嘅紋身清晰可見。

我只係覺得，黃子瑜呢種女仔真係好難捉摸，就好似早兩三個禮拜整壁報板嗰陣，一時對我呼呼喝喝，當正我係阿四咁要我擒高擒低、拎呢樣搬嗰樣，一時又會嘻嘻哈哈同我玩到彷彿呢個世界剩係得返我同佢，有時候我都會俾子瑜呢種忽冷忽熱嘅態度，搞到我好煩惱。

就好似尋日咁，無啦啦小息捉咗我出走廊行埋一角，審犯咁問我係咪鍾意曉琳，我梗係話唔係啦，雖然我哋三個依家會一齊食飯啫，但係我同曉琳自相識以嚟，單獨傾偈加埋都唔知有無超過十句。

「你唔認吖嘛，好啊我而家返入課室爆晒俾全班知。」子瑜轉身就走。





「喂！咁真係無吖嘛，我做乜要呃你啫，黃子瑜你想點喎？」我急腳捉住佢手截停佢。

「我想點？等曉琳知道你由開學第一日已經鍾意佢囉。」子瑜想捹我開隻手。

「無啊…你要我發毒誓都可以。」但我死捉住佢隻手唔放。

「咁又唔使發毒誓，你想我唔爆你秘密都得，咁你應承一樣嘢吖，你要應承我，做我男朋友。」

「咩...咩話？做你男朋友？」我有無聽錯？





「係啊。」子瑜斬釘截鐵咁講完之後，就一聲不發望住我，等緊我答案。

如果我前面有塊鏡，我諗我只會望到一個擘大個口得個窿嘅自己，就喺我腦袋斷線嘅一瞬間，子瑜掙脫咗我隻手。

「哦，唔應承吖嘛？咁我而家返去話俾全班知...喂！大家聽住！！原來陳佑男佢...！！」

「咪住先啊...」

就係咁，為咗保住我嘅清白，最終我都係選擇屈服，事後子瑜解釋我只需要扮佢一日男朋友，星期日陪佢同黃子俊出嚟見佢爸爸，到時候我仲可以免費入迪士尼樂園玩足一日，我諗諗吓我又好似無咩損失就應承咗，雖然我完全唔理解點解佢要我咁做。

不過我都開始習慣，呢個女仔就係咁，捉摸唔到猜唔透。

「你同佢好老友咁喎，頭先見佢同你搭晒膊頭。」子瑜批一批我手踭。

我哋一行人而家身處於樂園正門，排緊隊準備入閘。





「係咩？不過其實你爸爸都幾好人吖，佢手臂啲紋身原來係堆三眼仔公仔嚟，幾得意。」我專登細細聲喺子瑜耳邊講，費事俾排喺前面嘅大叔聽到。

原本我打從心底想幫大叔講返一兩句好說話，點知都係換來子瑜嘅另一番冷淡回應。

當排到我哋嗰陣，大叔仲幫黃子俊問職員哥哥拎咗個生日襟章，據講只要戴住呢個襟章，樂園裡面嘅職員見到你都會同你講句生日快樂。

誰不知大叔踎低幫黃子俊扣襟章嗰陣，子瑜竟然拉住我隻手，一鼓作氣向住樂園裏頭方向衝。

「子瑜你去邊啊？」大叔喊道。

我俾子瑜捉住隻手，逼住向前跑，我回頭一望，見到黃子俊差啲想衝埋一份，好彩俾大叔及時截住，然後我睇見大叔無奈嘅表情，相信同我一樣，都係理解唔到發生緊咩事。

子瑜一直捉住我，我哋兩個一前一後咁跑咗一段路，我眼尾睄到沿途路人紛紛投來疑惑嘅目光，直至穿過條大街之後，子瑜先至肯停落嚟抖氣。





「呼...跑到好攰啊...應該可以撇甩咗佢哋啦。喂！陳佑男，我哋而家可以自己任玩啦！」子瑜一抖順條氣，就即刻進入咗亢奮狀態。

「吓？」

講到最尾，其實最搞唔清楚狀況嗰個，好似係我先啱。

我抬高頭一望，有塊大大塊嘅招牌，用英文寫住：

Tomorrowland。