【校園／愛情】戀上鄰家女孩（布甸篇）: 49. 時間轉逝留影在

我依稀記得，轉多兩個角落有間鋪，裡面會有我想買嘅嘢。

「老闆娘！唔該你我想要呢把遮。」

「好啊，四十蚊啊。」老闆娘將把長遮遞向我面前，我摷銀包嗰陣，唔覺意攞錯咗子瑜個銀包出嚟，正當我想塞返入去褲袋嘅時候，俾隔離路過個師奶撞咗一下，手殘跌咗落地。

我耷低頭伸手去執，子瑜個銀包跌到散開咗，右邊擺相個位一瞬間吸引住我注意力，裡面攝咗張即影即有合照，Sanrio主題，但唔係子瑜最鍾意嘅布甸狗，而係嗰隻全身白色、大大隻耳仔嘅玉桂狗。

不過以上都唔係重點...





咁多年嚟，子瑜成日都叫我唔准偷睇佢個銀包，原來係因為個傻妹仲一直keep住呢張合照喺裡面...咁係咪即係代表，其實你咁多年都無放低過嗰一日發生嘅事...

我摀低身，執返起個銀包，再慢慢企返起身，但眼球依然對焦喺呢張合照上面，忽然間所有回憶一下子重新注入腦海。霎時之間，除咗張相之外，我眼耳口鼻五官都好似失去咗同外界連繫嘅能力，任由老闆娘再三呼喚我，人聲、雨聲、雷聲都開始變成一團無法辨別嘅雜音。

因為呢張合照，裡面嘅主角正正係我同黃子瑜，我哋肩並肩緊靠住對方，而個重點係，我哋兩個仲好似情侶咁拖住對方...

背景係迪士尼樂園嘅美國小鎮大街。

而時間係三年前...





同今日烏雲密佈嘅天色啱啱相反，嗰日係一個風和日麗嘅星期日朝早。

//

我、子瑜同埋佢細佬，三個人喺青衣站往東涌方向嘅月台上面，等緊一個人出現。

「妖咁耐都未嚟㗎。」子瑜左望右望，已經等到有啲唔耐煩。

「佢嚟啦！佢嚟啦！」黃子俊扯一扯佢家姐條短裙，指住右邊扶手電梯，然後就向住嗰個方向直衝，捉都捉唔住。





「黃子俊！！」係一把粗獷又帶點狂野嘅聲線。

但我睄到子瑜好似反緊白眼。

我順住黃子俊衝緊嘅方向望過去，原來係一個黑黑實實，染咗一頭金毛嘅大叔，望落去年紀頂盡都只係四十歲，以前細個我唔識點形容，但大個我知道，啲人通常叫呢種打扮做老MK。

原本黃子俊同個大叔互相向住對方跑，點知個大叔突然間一個急停轉身，匿咗喺條柱後面，我真係估唔到咁大個人都仲會玩捉伊因，但就係呢下突如其來嘅動作搞到黃子俊勁興奮，嘻嘻哈哈咁圍住條柱同個大叔你追我逐。

「仲捉你唔到？哈哈！點啊我個壽星仔今日準備好去happy未？」離遠見到個大叔一手抱起咗黃子俊。

呢個時候，子瑜示意我陪佢一齊行上前會合，但佢表情完全係出賣咗佢係不情不願。

「子瑜！無見一年你高咗好多喎。」個大叔一手攬實黃子俊呢隻脫疆馬，另外再向住子瑜展開懷抱。

「哼！我先唔要啊。」子瑜又嘟起個嘴。





「唉啊好傷心，子瑜而家連老豆都唔攬喇。」

無錯，呢個大叔就係佢姊弟嘅親生老豆...根據子瑜所講，佢老豆早幾年因為爛賭而欠落一身賭債，仲俾債主上門拍門追數滋擾，佢哋媽咪最後忍無可忍之下就帶埋佢兩姊弟離家出走，但每年黃子俊生日，佢都會一盡父親責任專登帶佢兩姊弟出嚟慶祝。

今年亦都唔例外。

唯一唔同嘅...事緣尋日我喺子瑜威逼利誘之下，同佢達成咗一個奇怪嘅協議，要我陪佢兩姊弟一齊出嚟慶生。

其實你話我唔緊張就假，始終三唔識七，跟住見到佢老豆真人嗰陣，黑黑實實又一頭金毛，仔細睇兩邊手臂都有紋身，如果喺街見到我多數會驚到轉身走人，但係頭先見佢同黃子俊玩得咁開心，我又覺得...其實呢個大叔應該都唔係壞人吖...見到佢俾子瑜拒絕，我反而仲抵佢有啲慘...

「咦？你係子瑜個同學仔啊？小朋友你點稱呼啊？」大叔直面望住我上下打量，雖則頭先我話已經無咁驚，但其實而家我手心係標緊汗。

「佢叫陳佑男，係我男朋友。」子瑜直接搶答咗。





「哈哈！咁唔怪之得子瑜唔肯過嚟攬老豆喇，原來已經大個女有男朋友喇。」阿大叔你誤會咗喇，其實呢個都係子瑜威逼利誘我嘅其中一部份...

但係大叔堅係當咗我係佢個女嘅男朋友，望住我喺度評頭品足，我企咗喺度尷尬到唔知可以做乜好。

不過無計喇，鬼叫我應承咗子瑜，唯有頂硬上，企直啲個人，盡量唧個笑容出嚟。

「唔錯唔錯，係表情鈍咗啲啫，唔使咁緊張喎阿男朋友仔。」大叔仲伸手過嚟拍咗我一下膊頭，好似好老友咁。

「老豆，乜嘢係男朋友啊？」黃子俊個豆釘喺呢個時候扯住佢老豆條褲問。

「哈哈哈哈，子俊都大個仔要見識吓㗎喇...既然子瑜你同你個同學仔拍緊拖，點解唔拖手㗎？嚟嚟嚟，喺子俊面前拖一次手示範，咩係男朋友。」

喂喂點解好似有啲亂嚟咁嘅？明明協議無講到話要拖手㗎喎，明明尋日子瑜叫我扮佢男朋友就得㗎啦喎。