【校園／愛情】戀上鄰家女孩（布甸篇）: 48. 熟悉感覺猶未散

不過子瑜好似就完全無呢個擔憂，一味顧住向前行，其實眼前呢段路，對於我呢個由細到大都住喺度嘅地頭蟲嚟講，實在係再熟悉不過，但係同子瑜一齊行街市就反而係我印象中嘅第一次。

呢座街市算係啲新式街市，光猛企理，穿過門口頭幾檔乾糧鋪之後，沿途經過一排排海鮮檔，同樣嚟買餸嘅阿叔師奶塞到條路水洩不通，我同子瑜要一前一後左穿右插先可以維持前進步伐，但係笪地又濕漉漉，正當我擔心子瑜著住拖鞋好易會跣親嗰陣，我自己就差啲跣咗一腳。

「阿妹，今晚又煮咩俾細佬食啊？」我沿住聲線來源望過去，見到左邊魚檔有個八字鬚嘅阿叔向住子瑜招手。

「嘻嘻，未諗啊輝叔。」子瑜笑笑口回應，但我就差啲又跣多一腳，企穩腳步抬頭一望個招牌，大大隻字寫住輝記海鮮，先聯想到眼前呢位大叔可能就係檔主。

「喂阿妹，今日啲黃花魚好靚啊，哎呀啱晒你呢啲黃花閨女食喇。」點知右邊又整多個有鄉音嘅阿叔，我唔知黃花閨女關唔關子瑜都係姓黃事，但上一輩啲搭訕技巧原來都幾別樹一格。





「但係志叔你條魚翻咗肚喎。」子瑜無視咗鄉音大叔嘅邀請，直接指住水池條翻肚魚。

「佢瞓咗覺啫，等我拍醒佢！」志叔跟手拎起個魚撈網一野拍落條魚度，但好似無咩效果…

如是者，經過幾檔檔主嘅熱情活力嘅招待之後，子瑜喺雜貨鋪買咗紥梅菜，又喺菜檔買咗一斤白菜仔，然後我同子瑜嚟到豬肉檔面前。

「廿蚊免治豬肉吖，唔該華哥。」原本個豬肉佬背對住我哋，子瑜趷高腳拍一拍佢膊頭，就即刻擰轉面四萬咁口向住我哋。

「喂～子瑜。咦？帶咗個男朋友仔嚟喎？咁乖幫手拎餸添啊？」華哥嘅親切笑容真係有別於頭先嗰堆檔主，起碼得佢噏得出子瑜個名，至於咩男朋友仔就…





「佢係我請返嚟嘅阿四嚟，專門幫我拎嘢。」子瑜一邊望住我，一邊向華哥解釋。

「又唔好咁講，我話你知呀啊女，肯陪女仔買餸嘅男仔都係好男仔嚟。嗱呢度私人醒多啲俾你。」去到最尾嗰句，華哥刻意壓低聲線。

「唔好啦，我得兩個人食，食唔晒㗎。」子瑜連忙搖手道。

「咩兩個人食啫，子俊食多啲快高長大，仲有你男朋友仔都要食㗎嘛！欸得㗎喇！拎住啦，見係你咋，一陣俾事頭婆見到又咿咿哦哦㗎喇。」

子瑜有啲唔好意思，諗住俾多十蚊華哥，但係華哥堅決唔收，唯有將個銀包塞返俾我，但佢就無將袋免治豬肉塞埋俾我，而係自己親自拎返，我估係出於對華哥禮貌上嘅尊重。





「多謝華哥。」子瑜臨走前再三道謝。

「客咩氣，睇住你大㗎嘛，多啲嚟幫襯啦。」華哥仲不忙瞪大眼睛望住我，好似俾緊啲暗示我咁。

「知道。」子瑜回應。

同華哥道別之後，我哋離開咗豬肉檔範圍，經過呢短短十分鐘嘅街市體驗，我先知道原來子瑜已經同呢度啲檔主關係咁親近，我拎住袋餸，從後望住呢個嬌小玲瓏嘅背影，一條小短褲再赤腳踢住對小拖鞋，咁嘅年紀可以喺街市度應付自如咁四圍遊走，又同啲檔主有講有笑仲有得加料，我真係打從心底裡佩服子瑜。

我諗換轉如果我一個人入嚟買餸，實俾人當水魚劏到一頸都係血。

「喂，發晒吽哣咁，你唔係話有嘢要落嚟買㗎咩？你想買咩啊？」子瑜輕輕一腳踢落我隻腳度。

！！

呢種感覺…





「Hellohello？」子瑜伸個頭過嚟望住我對眼。

「啊？係啊…你買完餸嗱？」掛住回味，我個腦差啲運轉唔切。

「買完啦，等你咋。」

死喇，我頭先喺佢屋企話有嘢要落街買，其實我都只係隨口噏，諗住作個藉口陪佢一齊買餸，無諗過子瑜又會咁好記性，兼且當我講嘅係認真。

但忽然間我靈機一觸，諗起有樣嘢又真係需要買，於是乎我就同子瑜講。

「你喺度等我一陣，我去買樣嘢好快返，唔好行開啊！！」跟住我攬住袋餸就轉身跑走。

「你去邊啊？」子瑜焦急嘅聲線喺我腦後迴響。





放心啦，我好快就會返嚟。