【校園／愛情】戀上鄰家女孩（布甸篇）: 47. 被遺忘的小白襪

「Hi...」我緊張到連打招呼都口窒窒。

「你做咩拎住我啲衫，死變態佬！」結果一嚟就俾子瑜鬧，你唔好誤會啊，係你細佬塞俾我㗎咋。

子瑜怒睥咗我一眼之後，就搶咗佢套衫轉身衝入廁所閂埋房門，而我就企咗喺門外面，但心裡面竟然開始萌生逃避嘅念頭。

「子瑜啊，其實係黃子俊推我出嚟㗎咋，如果你唔想我跟住你去買餸，我可以返屋企先㗎。」我對住廁所門口細細聲講。

「做咩啊，你而家好唔想見到我咩？」廁所門傳嚟子瑜嘅聲線。





「咁又唔係...」

點知呢個時候廁所門突然打開，我驚係子瑜無著衫嘅畫面，下意識舉起雙手揞埋對眼。

「咩唔係吖，你一見到我就揞住對眼。」我慢慢垂低手先發現原來子瑜已經換好衫，佢呢身裝束係件純白色衛衣加條黑色真理褲，對學生小白襪早已經不知所踪，換成幼嫩白滑嘅小腳趾向住我打招呼。

可能子瑜發現我視線喺度向佢上下打量，佢有啲唔好意思咁扯返低啲條真理褲，但係真理褲就係出名短，點扯都無用，再扯就會甩褲。

「喂，你望夠未啫？」子瑜又睥咗我一眼。





「欸...出面個天好似陰陰地想落雨，我哋使唔使帶返把遮啊？」俾子瑜睇穿咗我做緊咩，我即刻諗到嘅係換個話題轉移視線。

「哼！有話想同你出去咩？」子瑜又嘟起個嘴。

唔知係我有自虐傾向定係點，我總係鍾意搵啲嘢激吓呢個女仔，睇住佢嬲爆爆個樣，嗰種熟悉嘅感覺又重新湧現。

「無…咁我都係返屋企先，唔打擾你哋啦。」

「好呀，你走囉。」子瑜仲讓埋條路俾我行。





我又無諗過子瑜會讓埋路俾我離開，當我行到門口嗰陣回身一望，見佢唔再係嘟起個嘴，而係咬住嘴唇，眼神若有所失咁望住我。

忽然間，我又唔捨得就咁掉低黃子瑜自己走咗去。

「啊，我醒起我有啲嘢要落街買，不如一齊…？」我硬着頭皮問。

「哼！」子瑜起初谷起個嬲爆爆嘅表情，但見佢慢慢開始努力掩飾緊笑意，然後再行埋嚟將銀包、電話同鎖匙統統塞晒俾我。

「行啦慢吞吞，你幫我袋住佢哋啊，我呢條褲無袋啊。」喂喂明明你件衛衣正面就有個百寶袋㗎喎。

我攤開手一望，子瑜個銀包依然係布甸狗款式，條鎖匙仲係連住個布甸狗鎖匙扣，我將佢哋分門別類咁塞入左右褲袋。

「黃子俊你乖乖留喺度，唔好立亂開門俾人啊。」子瑜一邊著拖鞋，一邊向黃子俊示意我哋出緊門口。

「知道啦～」你個死仔包把聲笑得咁開心嘅。





結果，我同子瑜都係無帶遮就出咗門口。

搭𨋢途中，我同子瑜面對面，各自靠牆企，佢踢住對拖鞋，散發住一種鄰家女孩嘅氣息。

「黃子俊個死仔包，根本就無唔記得帶鎖匙，我頭先出門口攞鎖匙嗰陣，明明就剩係得我一條鎖匙掛咗喺度。」

「但係我返嚟嗰陣，佢又真係坐咗喺走廊度。」

「肯定係啲唔知咩古靈精怪嘅鬼主意啦，呢兩個禮拜佢成日都問我點解唔見咗你。」子瑜斜眼望住我，似係幫緊黃子俊問我咁。

「咁...你點同佢講？」我選擇咗迴避問題，但其實我係想知道子瑜會點解釋，因為佢點樣解釋，某程度上等於佢點睇呢件事。

「可以講啲咩吖？而家人哋都唔理我，諗起就嬲呀，哼哼！」呢個時候𨋢門重新打開，子瑜就轉身離開，我只可以追住佢嘅背影行。





黃子瑜我邊有唔理你，明明係你無聽我電話，我一直都怕你嬲咗我，所以先唔敢打擾你。

離開電梯大堂之後，我哋兩個穿過斑馬線向住街市方向行。

「做咩四圍望啊，怕撞到熟人啊？」又俾子瑜發現我做緊咩，的而且確呢啲放學時間，我哋行咗無耐已經撞到幾個同學，好彩都係啲低年班師弟，嗰啲耷低頭玩緊手機全程無望過條路嘅小弟弟。

「邊有啊...我係想話個天咁黑好似真係會落雨…」

不過我今次真係唔係剩係想扯開話題，事關個天越嚟越暗，遠處間唔中仲響起一陣陣𠾐𠾐雷聲，我擔心狂風暴雨好快就會降臨。