【校園／愛情】戀上鄰家女孩（布甸篇）: 46. 正在燈火闌珊處

「欸...頭先...」正當我諗住向子瑜解釋嗰陣...

「黃子瑜你今日有無帶鎖匙，我唔記得帶鎖匙啊。」黃子俊就衝埋去佢家姐度翹實佢隻手，打斷我說話。

「有啊，你等我摷吓先。」呢刻子瑜俾佢細佬纏住，暫時我又好似個外人咁企咗喺度。

「有無啫？無啊，你都無帶，哈哈...」黃子俊見家姐同自己一擔擔，笑得好興奮。

「我記得明明今日放咗入去㗎，去咗邊呢？」





呢個時候我都開始有少少戥子瑜緊張，唔覺意伸咗個頭去䚎下，如果俾著係以前，可能我已經一手擸咗子瑜個書包過嚟幫佢摷，要知道，好多時佢返到屋企，先發現原來條鎖匙塞咗喺某個暗格，正宗大頭蝦嚟。

但如今我只係企定定喺度觀望，唔敢上前幫手，我而家先至實實在在感受到，我同子瑜之間不知不覺間多咗一道隔幕。

而子瑜搵到咁上下，嘟起個嘴垂低雙手宣告放棄。

「不如用陳佑男嗰條啦！」黃子俊鬆開佢家姐隻手，轉過嚟捉住我。

「我先唔想用佢嗰條...」子瑜發晦氣怒睥咗我一眼。





話就話我同子瑜隔咗段時間無見，之但係我哋又唔係嗌咗交反咗面，做咩對我態度變得咁差，唔通佢自從嗰日之後真係嬲咗我？

但事到如今佢兩姊弟都無帶鎖匙，如果唔用我嗰條後備匙，睇怕就要流浪街頭等佢哋媽咪放工返嚟接佢哋。

「我開俾你哋喇，開完我就會走。」除此之外都無其他辦法。

「喂！點解你會拎住我哋條鎖匙嘅？」子瑜問我。

跟住黃子俊就幫我解釋成件事嘅來龍去脈，你個衰仔又話驚你家姐鬧你？但諗深一層就知道子瑜點會因為咁小事而鬧你。





經過頭先嘅卡匙事件之後，今次我小心翼翼，對準個鎖匙窿，慢慢將條匙插入去，好彩上天眷顧我，同類事情並無再度發生。

點知道木門一打開，黃子俊就捉住我隻手，夾硬扯咗我入屋，仲直接衝咗入佢哋間睡房，然後閂埋房門。

鞋都未趕得切除。

「嗚嘩！差啲俾黃子瑜破壞我嘅大計！」黃子俊當正自己老闆咁款坐喺張電腦椅度，我就一臉錯愕。

雖然都估到我又俾個衰仔擺咗一道，不過而家身處子瑜閨房，我第一時間望向牆上面掛住嗰塊松木板，上面嘅舊相依舊安然如故，數量無多到，亦無少到，但以前嘅回憶一下子又湧上心頭，不自覺又百感交集。

忽然間房門傳出巨響...

呯！呯！呯！

「黃子俊！你鎖咗度門想點啊！我點換衫啊？」子瑜喺房門外大呼大喝，唔知點解雖然佢唔係鬧緊我，但每粒字都觸動到我嘅心靈。





「不如開返道門俾你家姐入嚟先？」我正想伸手開門之際，黃子俊即刻截住我。

「唔得唔得，唔可以放佢入嚟住，我哋仲有啲大事未傾。」個衰仔有咩想講？

「我要換衫落去買餸啊，你再唔開門嘅話，我今晚唔煮飯㗎喇！」就算隔咗道門，我都估到子瑜而家肯定係嘟起個嘴，嬲爆爆咁嘅樣。

正當此際，我見黃子俊眼珠左轉右轉，然後向我展露出一下不懷好意嘅笑容，似乎即將有奸計要發生，跟住佢打開衣櫃拎咗套衫塞喺我手入面，再伸手拉開返道房門，將我夾生推咗出去。

「陳佑男話想陪你一齊落去買餸啊，我做住功課等你哋返嚟啊。」

黃子俊講完之後就跟手閂埋咗度房門，剩返我同子瑜兩個你眼望我眼，我個心仲喺度怦怦跳。