【校園／愛情】戀上鄰家女孩（布甸篇）: 45. 眾裡尋她千百度

又點會估到，返到屋企居然會見到子瑜細佬，著住校服孭住個小學雞書包，一個人孤伶伶坐咗喺條走廊度。

我行埋去黃子俊面前扶返佢起身：「個地下好污糟㗎，做咩坐喺度唔返屋企？你家姐呢？」

「我唔記得帶鎖匙啊，黃子瑜又未返屋企。」

唉...我真係無你兩姊弟咁好氣，做咩好學唔學，偏偏學埋你家姐啲大頭蝦嘢，好彩佢哋不嬲都有條後備鎖匙keep咗喺我屋企，就係為咗應付呢種情況。

「咁你等我一陣，我返屋企摷返條鎖匙俾你。」講完我就轉身開門入屋，佢哋屋企條後備匙就收埋咗喺門口隔離個儲物櫃裡面。





「嗱，鎖匙啊，你開完就俾返我。」我將條鎖匙遞俾黃子俊。

我企喺旁邊好似監工咁睇住黃子俊開道鐵閘，但見佢好似有啲障礙，開極都開唔到，然後一臉無辜咁望住我。

你話係咪真係激死？我行埋去睇吓發生咩事，見條鎖匙原來卡住咗喺個鎖匙窿度，扭又扭唔到，抆又抆唔返出嚟，的確係有啲棘手。

「要諗個辦法抆返條鎖匙出嚟先得啊，如果唔係就唔使旨意返屋企。」我同黃子俊輪流試咗幾次，條鎖匙都係無動於衷。

「點算好啊？俾黃子瑜知道實會俾佢鬧死。」黃子俊垂頭喪氣。





「唔好咁易放棄先，一定有辦法嘅。」

但係條鎖匙偏偏好似同你作對咁，死都唔肯出返嚟，我真係唔想子瑜喺呢個時候返嚟，俾佢見到我而家咁狼狽個狀況，特別係我哋隔咗咁耐無見。

無錯，一定有辦法嘅。

我諗，而家先落街搵開鎖佬都唔係明智之舉，何況我都唔知要幾多錢開鎖。於是我拎部電話出嚟上網查吓鎖匙卡住有咩解決辦法，先知道如果條鎖匙太舊嘅話，就好易發生呢啲情況，同時間我都搵到好多實例教學。

黃子俊挨喺我旁邊，趷高隻腳伸個頭入嚟望吓我睇緊啲咩，我叫佢唔好周圍走，企喺度等我一陣，我返入屋企摷啲嘢好快出返嚟。





「擺咗喺邊呢？擺咗喺邊呢？」我衝返入屋企之後，起勢咁摷屋企啲櫃桶，我好記得我哋屋企係有一支，但係就醒唔起放喺邊個位置。

點解梗係需要你嘅時候，就偏偏搵唔到你喺邊，我望住地下一件又一件嘅雜物俾我摷到跌晒落地，我個心就越嚟越焦急。如果呢刻子瑜咁橋返到嚟，見到佢細佬企喺走廊中間，有屋企返唔到，有鎖匙但卡住咗…唉唔好諗咁多喇，快啲摷到支嘢出嚟解決咗個問題先。

而且明明個天都未黑，但係我都硬係覺得間屋太暗，光線唔夠充足阻礙我搵佢出嚟，於是我又跑向門口撻著盞廳燈，正當呢個時候，突然間有個標誌式嘅紅色樽蓋，出現喺地板吸引住我眼球。

係喎我真係正死蠢嚟！呢啲嘢梗係放喺鐵閘附近先方便用，點解我頭先仲要喺度左摷右摷。

「有喇！」我一手拎起支潤滑劑，衝返出走廊對住個鎖匙窿噴咗幾下。

「等佢一陣，應該就可以抆得返出嚟。」我對住黃子俊講，然後齊齊望住潤滑劑啲泡泡慢慢消散，跟住我捉住鎖匙個頭，深呼吸一口氣，輕輕向外一抆，條鎖匙應聲彈出，比我想像中順利。

「好耶好耶！」黃子俊喺旁邊拍爛手掌。

呼，一額汗。





原先諗住俾條鎖匙黃子俊開門，結果我就只係幫倒忙，條鎖匙太舊卡住咗喺人哋屋企鐵閘個鎖匙窿入面，不過唔使俾子瑜見到呢幕，我都算係執返身彩。

「黃子俊你做咩事咁開心嘅？」突然間電梯大堂方向傳嚟一把女仔聲，幾乎將我全身凍結住，我完全無為意佢返咗嚟。

「陳佑男好勁啊，幫我抆返條鎖匙出嚟啊！」黃子俊跳跳紥咁指住我叫。

我一手拎住支潤滑劑，另一隻手揸住嗰條鎖匙，就係衰在無手揞住自己塊面，而個女仔嘅步伐亦都越逼越近。

我擰轉身一望，就喺呢刻同個女仔四目交投，氣氛尷尬搞到我唔知望邊好，唯有耷低頭避開佢眼神，成碌木咁企喺度，連招呼都唔記得打。

曾經，我喺腦海裡面模擬過無數次同子瑜重遇嘅情景，但估唔到當真係見返面嘅時候，我竟然會緊張到講唔到嘢。

「點解你會喺度嘅？」子瑜行到我面前，率先打破沉默。